9 AUGUST 2020(SUN)
見屋企可以用嚟煲湯嘅藥材都用得七七八八,所以趁早幾日出關入貨時,就去入返啲貨,咁宅在家嘅時候都可以有啲湯水飲下嘛!
見到店主姐姐出左一個新湯包 牛大力粉葛粟米湯,有助袪濕清熱同埋補氣健脾,幾樣功效都好似幾啱小小豬,所以就買返包嚟煲俾兩位老細飲啦~
粉葛同牛大力我都係用乾貨(即一般嘅藥材店買到嘅各材料),因為佢地經過切片晒乾或者先蒸熟再曬,咁佢會冇咁寒涼,適合唔同體質嘅人仕,尤其更加啱小朋友飲呀!
瘦肉洗淨汆水~
煲內放約3L水,然後放入所有材料~
待滾起後,繼續用大火加蓋煲約15分鐘~
之後轉慢火加蓋煲多2小時~
最後加鹽調味,就可以飲得啦~
雖然都係用左好多唔同嘅藥材,但啖湯一啲都唔苦,仲帶有少少嘅清甜味,所以小小豬唔洗催都同我豪飲兩大碗呀!
以下係各食材嘅功效,可以參考一下呀(網上資料):
粉葛 – 有解熱發汗的功效,可使神經和肌肉鬆弛,心情寧靜,晚上睡覺也會較安定。
牛大力 – 有補虛潤肺、強筋活絡及清熱解毒作用。
炒南豆 – 健脾化濕、消暑袪水腫。
赤小豆 – 健脾袪濕、利尿消腫。
淮山 – 有益氣養陰,補脾肺腎,對脾胃虛弱、倦怠無力、食欲不振、肺氣虛燥有好大治療作用。
茨實 – 有補脾化濕、益腎固精功效。
白蓮子 – 寧神清心安眠、對脾胃及心腎都有固本陪元的作用。
茯苓 – 利水滲濕、利尿,可改善記憶力,還有幫助鎮靜的功效。
沙參 – 能清熱養陰、潤肺止咳。
粟米芯 – 健脾利濕、消滯。
粟米 – 健脾和胃,利水通尿,益肺寧心。
紅蘿蔔 – 就有助健脾消食,同埋化痰解毒。
蜜棗 – 止咳潤肺、化痰平喘功效。
溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
沒有留言:
發佈留言