【明目補腦】日月魚杞子合掌瓜瘦肉湯

27 AUGUST 2020(THU)

嚟緊就係開學，不過冇得面授全部都係對住電腦嚟上，講真都真係超擔心小小豬對眼睛，都好驚佢嘅近視又會加深。

日月魚對眼睛好好，咁就緊係要煲多啲俾依隻四眼小小豬飲。早幾日經好友教路，加埋杞子同合掌瓜一齊煲，除左有助舒緩眼澀之餘，又可以提升腦仔發展，仲滋陰清熱、理氣健脾同燥濕化痰，咁多好處就緊係即刻煲俾小小豬飲打定個底啦~

日月魚一両、准山一両、圓肉一両、百合一両、南北杏約一湯匙、杞子一両、陳皮一角、蜜棗三粒、合掌瓜兩個及瘦肉約$40~

日月魚洗淨後浸至軟身~ 

其他藥材浸洗一陣~

陳皮浸至軟身，然後刮囊~

合掌瓜洗淨去心切塊~

瘦肉洗淨汆水~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

以下係各食材嘅功效，可以參考一下呀(網上資料)：

日月魚  - 明目功效高、舒緩眼乾、補腎益肝、養顏美髮功用，含有豐富蛋白質、磷、鐵、碘及鈣質，所以對調節人體代謝平衡及促進生長都有一定幫。

准山 - 有益氣養陰，補脾肺腎，對脾胃虛弱、倦怠無力、食欲不振、肺氣虛燥有好大治療作用。 

圓肉 - 開胃健脾、養血安神、壯陽益氣、補虛長智的功效。 

百合 - 能夠解毒、安神、治療咳嗽失眠，對女性來說還能夠很好的抗衰老。 

南北杏 - 可止咳下氣，潤燥消積。 

杞子 - 滋補肝腎、益精明目功效，及提高身體免疫力。 

陳皮 - 理氣健脾、燥濕化痰。 蜜棗 – 止咳潤肺、化痰平喘功效。 

合掌瓜 - 有利尿排鈉，有擴張血管、降壓之功能。據醫學研究報道，合掌瓜對兒童智力發展影響較大，可以提高智力。

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！