【HAPPY BUFFET TIME】味歷東瀛自助晚餐@港島太平洋酒店

5 APRIL 2019 (FRI)

小小豬近期愛上食自助餐，緊係啦....可以自己揀佢鐘意食嘅嘢，又可以唔洗坐定定係餐廳內行來行去，絕對係佢最鐘嘅事。

見港島太平洋酒店嘅自助餐換左以日式為主題嘅「味歷東瀛」，復活節假期冇得外遊日本，咁就嚟食一個豐富自助餐感受下日本氣氛嚟止下癮啦~

為食嘅小小豬一聽到去食BUFFET就急急腳勁興奮咁出發啦~

冰鎮海鮮盤絕對係第一個推介位，有波士頓龍蝦、鱈場蟹腳、紐西蘭青口、翡翠螺、大蝦同埋蜆，每一種海鮮都好鮮甜，我個人就最鐘意龍蝦同埋翡翠螺，唔覺唔覺食左勁多，又將減肥計劃忘記了...哈哈哈~

冷盤小食種類都幾多，為左今次東瀛主題，都有兩款口味嘅冷麵添~

當然仲有刺身同壽司啦~

第二個推介位就係食個即點即燒嘅爐端燒，佢嘅種類都好多，小小豬話嗰個和牛串、墨魚串同埋小蕃薯好好食，不過佢就鐘意睇住廚師哥哥即刻燒多啲，每次出去拎嘢食都一定睇一轉先返埋位~

仲有廚師即煮嘅日式拉麵，仲有三款湯底任揀，依個就係老公推介(佢食左兩碗呀)，佢話個湯底唔錯，啲麵仲好彈牙~

熱食方面都有驚喜，基本上好多日式菜式都可以見到，好似有關東煮、干貝炒麵大阪燒、和風芝士牛蒡炒飯、咖喱豚肉壽喜燒.....，依啲全部都好啱小小豬口味呀~

當然仲有天婦羅同日式炸雞啦~

就連小小豬平日好鐘意食嘅日式燉蛋都有呀~

YEAH....我地開大餐啦~

食飽飽主菜就緊然開始食甜品，啲甜品都好有日本風，細細件夠精緻，而且味道都唔錯，入口唔太甜，真係唔覺唔覺食左好幾件呀~

仲有我鐘意食嘅蕨餅，睇住廚師師現場即製黑糖同抹茶蕨餅，真係特別好食呀~

小小豬就緊係鐘意食依個即叫即整嘅焙茶雞蛋仔，估唔到茶味雞蛋仔又幾特別~

仲有即叫即整嘅棉花糖~

食棉花糖啫...唔洗咁狼C樣呀...哈哈哈~

食埋杯小小豬至愛嘅Häagen-Dazs雪糕，咁就真係完美啦~

今日小小豬真係食左好多嘢，可以話係有史以來最多嘅，佢個肚真係食到好似脹爆咁，所以話呢.....我地三口子都食到超滿足飽飽咁走。

小小豬未離開酒店就已經話下次又要再嚟，咁佢嘅價錢又唔算貴，加上食物都唔錯，所以都真係可以再嚟ENCORE呀！