【提高免疫力】羊肚菌合掌瓜紅蘿蔔豬骨湯

26 APRIL 2019 (FRI)

復活節假期真係日日都出去玩，難得今日乖乖係屋企，所以都要煮個靚飯，煲個正湯先得。

之前聽好多媽媽朋友話羊肚菌係好有益處又好處多多，咁我就緊係又入手買嚟煲俾兩位老細飲。其實網上都有好多羊肚菌嘅湯水食譜，不過始終都係第一次煲，唔知個味道係點樣，所以就保險啲加埋合掌瓜同紅蘿蔔一齊煲，咁就有益得嚟又好飲啦~

羊肚菌有益腸胃助消化、化痰理氣、補腎壯陽、補腦提神等功效，用於消化不良、痰多氣短。另外還具有強身健體、預防感冒，增強人體免疫力的功效~

合掌瓜利尿排鈉，有擴張血管、降壓之功能。據醫學研究報道，合掌瓜對兒童智力發展影響較大，可以提高智力；紅蘿蔔有健脾助消化、潤燥明目；南北杏可止咳下氣，潤燥消積；陳皮理氣健脾、燥濕化痰；蜜棗止咳潤肺、化痰平喘功效。(網上資料)

羊肚菌半両(約15粒)、合掌瓜兩個、紅蘿蔔一條、南北杏一湯匙、蜜棗三粒、陳皮一角及豬骨約$40~

羊肚菌用清水浸10分鐘，之後剪開去除雜質，然後擠乾水份備用~

合掌瓜洗淨去心切塊~ 

紅蘿蔔去皮以滾筒式切塊~

陳皮浸至軟身，然後刮囊~

南北杏及蜜棗浸洗一陣~

豬骨隨水加入，然後汆水大約五分鐘~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約30分鐘~

之後轉慢火加蓋煲多2小時~

最後加鹽調味，就可以飲得啦~

初頭都怕羊肚菌會有一陣菇嗡味(始終都係菇菌類嘛)，不過今次煲又覺得OK，小小豬都幾鐘意飲，所以趁我買左一大包咁就煲多啲，等依個轉季嘅時候可以提高免疫力，咁病都病少啲啦！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！