由知道我報名參加之後小小豬就一直好期待,因為今年係我地三口子第一次參加迪士尼10K Weekend 2018,嚟一個「反斗奇兵3公里跑」可以入樂園跑餐飽呀~
我地等左一陣就夠準備出發啦~
嘩....好多參加者,雖然我地企得比較後,不過都感受到嗰一份熱鬧,大家心情都好興奮呢~
簡單嘅開跑儀式之後就可以開始跑啦~
仲有胡迪同巴斯為我地打氣添~
開步禮位置,小小豬就開始發力跑啦~
小小豬就一支箭咁跑入園,一入到園就開始見到好多迪士尼朋友同我地打氣,見到DUFFY就當然唔可以放過機會去集郵啦~
集郵過後,小小豬又繼續跑啦~
跑入ToyStoryLand我地見到翠絲,咁就當然又要嚟集郵啦~
基本上由開始到ToyStoryLand,小小豬都係跑住走。終於都開始攰了,所以要坐一陣休息一陣啦~
除左膠杯回收,大會仲會有水機等我地自備水樽嘅添水~
嘩...Merida公主呀....我都係第一次見佢係園出現,當然又要集下啦...哈哈哈~
慢行過後,有返啲精力,加上又差不多完成賽事,所以小小豬又嚟發力,要快快腳跑回終點~
見到打鼓表演者為我地打氣,小小豬又走埋去玩下啦~
終於我地都係指定時間內完成賽事~
小小豬最開心就當然係拎到個獎牌~
咁個獎牌又真係幾靚,仲好有份量添...哈哈哈~
除了回收膠杯,大會同時安排一系到回收設備,亦會收集食物殘渣,用來製作有機肥料,齊齊跑住嚟推行環保呀~
我地仲試玩左「Bonaqua®️冷熱加水站」,有自備水樽就有冷熱水飲,都好方便哦~
仲有一部回收膠樽機,咁就算飲樽裝飲品都可以推行環保啦~
跑完3K原本都以為小小豬冇晒能量,點知佢仲精力無限咁,咁我地又走入「兒童遊樂區」玩下充氣彈床同砌下大積木繼續玩啦~
今年初跑3K又冇想像中咁辛苦,仲覺得好好玩好有氣氛,所以小小豬都已經話想明年再嚟參加,要入園再繼續跑餐飽。
好呀...咁作為一名迪迪尼粉我就當然非常之想啦,所以出年如果時間就到(上兩年都因為係撞正考試日期我地先唔參加),我地一定要再參加,再嚟邊跑邊集郵,繼續再玩過呀!
沒有留言:
發佈留言