14 FEBRUARY 2018(WED)
因為小小豬提早新年放假,所以我都打亂晒我嘅陣腳。原來打算返學之後我就係屋企大洗特洗,點知最後就係要佢悶悶的留左係屋企兩日等我,所以就趁我做好晒所有新年任務之後,就同佢入去迪士尼玩返一轉啦~
小鎮大街周圍都佈置得好有新年氣氛呀~
哈哈哈...我嘅目標係好明確,就係要去集郵,所以第一時間就當然去DUFFY店搵我嘅至愛嘅朋友仔。
坦白講其實入園時都真係好多人(我地都要排隊入場),但出奇地同朋友仔集郵又唔算多人,我地大約用左二十分鐘就可以同晒DUFFY、STELLA LOU同埋GELATONI影相,真係超級開心呀~
集郵又點少得去搵財神GOOFY呢~
我嘅私心己經達成,所以就陪小小豬去玩。正當我地準備行入TOYSTORY LAND時,我地係探險世界入口就見到新朋友 - 黑豹,嘩...難得見到新朋友,我又點可以放過依個集郵機會,小小豬仲學黑豹耍功夫添~
玩完一輪就時間剛剛好,我地行返出之後小鎮大街睇下新春市集有咩玩啦~
先嚟就見到工作人員推出一車車嘅精品,當中最吸引嘅就係$100福袋,職員哥哥話每日只係限量100個,入面有價值$400嘅精品呀~
見$100都好似抵抵地,原來都好想買個睇下係乜東東,最後小小豬話唔知入面係乜,如果係女仔用品咁佢咪冇份。所以最後係佢極力反對下,佢就話拎住影張相就當買左(影左當買左咪就係平時我用嚟對付小小豬,估唔到佢識用返嚟對付我...哈哈哈)~
之後我地係戶外小食亭,見到好多唔同種類嘅香港地道小食,麥芽糖米奇多士、米奇砵仔糕和雞蛋仔.......等~
原本我地都想買啲嚟試下,不過有個小朋友一見到MICKEY & MINNIE行過,就即刻唔買嘢食,因為佢想同佢地影相。見佢真係好似一個小FANS咁,所以就陪佢排隊同偶像影相啦(雖然小小豬都幾花心,見一個公仔就鐘意一個,不過暗地裡都係最鐘意陪佢長大嘅MICKEY呀)~
好耐冇試過由日玩到夜,我就真係攰到冇朋友,不過小小豬就越夜越精神。哈哈....有得玩佢就乜都得,難得佢開心,我就捨命陪主子啦!
沒有留言:
發佈留言