【增強免疫力】竹蔗蘋果魚腥草茶

15 FEBRUARY 2018(THU)

所謂不時不食，就連湯水都係同一個原理，依排係街市的濕貨店見到有好多新鮮魚腥草，當時令就緊係買嚟煲下涼茶俾兩位老細飲啦。

其實我上年都煲過差不多的，今次店主姨姨就教我加埋個蘋果一齊煲，佢話煲出嚟更加甜，小朋友就更加鐘意。有人教路我就緊係受教，所以就買齊材料煲依個竹蔗蘋果魚腥草茶啦~ 

其實魚腥草係好有益處，可以話係天然第一抗生素，飲左就可以增強免疫力，同時照顧我地嘅呼吸系統，而且亦具有消炎作用，所以對感冒、傷風、咳嗽及喉嚨發炎都好有幫助。煲嘅同時加埋青欖、竹蔗同埋糖冬瓜，咁就對喉嚨有消炎消腫作用，而且仲可以清熱降火添！(咁咪啱晒依家天氣飲)  

蘋果兩個、魚腥草四両、竹蔗兩支、青橄六粒及糖冬瓜適量~ 

蘋果洗淨後去芯切塊，長氣少少再提一提，記得要煲前刮走佢果蠟呀~ 

魚腥草由於係根莖關係，所以要花少少時間同心機慢慢洗，將啲小根都除走，將佢變成白雪雪呀~ 

將所有魚腥草洗乾淨~ 

竹蔗洗淨破開兩邊~ 

青欖用刀背略拍扁(其實青欖可以加至十二粒，不過因為小小豬一向都唔太習慣青欖嗰一種味，所以我就將分量減半)~

煲內放約2L水，然後隨水加入竹蔗、蘋果同埋青欖~ 

待滾起後，用大火加蓋煲約15分鐘~ 

之後加入魚腥草及糖冬瓜，再轉慢火加蓋煲多30分鐘~ 

之後就可以隔渣飲用啦~ 

今次加左蘋果個味又真係唔同啲，清甜得嚟又有好香蘋果竹蔗味，我地密密飲，話咁快就清晒成支。小小豬仲話要ENCORE添，作為媽咪最開心都莫過於此.....哈哈哈！ 


溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！