【止咳化痰】龍脷葉枇杷葉桔餅茶

1 FEBRUARY 2018(THU)

依幾日我都有點點作病，有少少咳又有啲痰困住咁，都真係唔多舒服。趁初起就當然係煲啲止咳化痰嘅湯水飲下，希望可以順下啖氣。

原本都係打算去買少少龍脷葉嚟煲蘋果湯，不過藥材店店主就介紹咗我煲依個龍脷葉枇杷葉桔餅茶，佢話可以快啲清下啲痰，咁次次佢介紹都唔錯，所以就聽話執一份材料試下啦！

龍脷葉有助清熱化痰、利咽、潤肺、通便，對肺燥特別有效；琵琶葉就可以清肺化痰同止咳；桔餅就有助潤肺同埋紓緩肺熱；椰棗就滋潤同埋補中益氣。今次我都係第一次用椰棗，原來佢都係有豐富鎂鐵，食物纖維同埋胡蘿蔔素。另外佢嘅糖分係單純糖，所以就更加容易消化吸收，可以減輕腸胃負擔。(網上資料)

龍脷葉一両、枇杷葉一両、桔餅兩個、海底椰乾一両、椰棗三粒、南北杏一湯匙~

將所有材將所有材料洗淨~ 

桔餅要用水沖一沖，然後切碎~ 

煲內放大約1.5L水，加入所有材料~ 

先用大火煲滾~ 

 之後轉用慢火加蓋煲45分鐘~ 

 最後熄火焗10分鐘，就可以飲得啦~

龍脷葉同桔餅我之前都有煲過，所以小小豬都唔多抗拒，乖乖地飲咗一大杯。我自己就當然密密飲(想快啲清走啲痰嘛)，飲落其實都同平時煲嗰啲冇乜大分別，唯一就係比較淡啲，或者係今次改用椰棗關係，我想下次再煲時可以落多兩粒，咁甜味重多少少，應該會更加好飲。 

不過….話事話，我煲起之後就全日當水咁飲，飲咗三杯之後，又真係好似啲痰少咗，冇困住喉嚨唔上唔落個感覺，我估對我都起到作用呢！ 

溫馨提示： 

– 由於個別人仕體質不同，所以大家記得煲之前了解下自己，如有疑問，請先向註冊中醫查詢！