【超滋潤兼潤肺】鮮雪耳粟米紅蘿蔔湯

1 December 2017(FRI)

前幾日去九龍城買煲湯料時，見到店主剛剛返左好多大大粒又白雪雪嘅新鮮雪耳，當然即刻又買返一朵潤一潤。

原來我係打算用嚟煲木瓜湯水，點知兩位老細異口同聲話唔鐘意，最後....都係決定緊係用返嚟煲湯，買埋粟米紅蘿蔔，嚟一個超滋潤兼潤肺嘅鮮雪耳粟米紅蘿蔔湯啦~ 

新鮮雪耳就好似一個繡球花咁，真係好靚呀~

新鮮雪耳1朵、粟米2條、紅蘿蔔1條、百合1兩、白蓮子1兩、南北杏1湯匙、無花果3粒、瘦肉約$35~ 

新鮮雪耳小心清洗後，就可以去蒂切塊~ 

南北杏、白蓮子及百合浸洗一陣，記得要望一望蓮子入面嘅蓮芯清除晒未，如果加埋依啲蓮芯一齊煲湯，就會令到湯帶有苦味~ 

紅蘿蔔及粟米洗淨去皮切件~ 

瘦肉洗淨汆水~ 

煲內放約3L水，然後放入所有材料(新鮮雪耳除外)~ 

待滾起時，用大火加蓋煲約15分鐘~ 

再轉慢火加蓋煲45分鐘~ 

依個時候就可以加入新鮮雪耳，如果太早加入新鮮雪耳，就會煲到溶晒，咁成個湯就會好似漿糊，即刻影響晒個口感~ 

最後再以慢火煲多30分鐘，最後加少少鹽就飲得啦~ 

用新鮮雪耳啖湯就好似清啲，而且但食雪耳時又覺得好似爽口啲添。小小豬為左想靚仔啲就當然不停密密食，一個人仔就差唔多食左大半朵，真係俾依隻傻豬仔笑C呀…哈哈哈~ 

除左好飲好食之外，依家乾燥天氣，都真係要飲多啲雪耳湯，密密滋潤返下先得呀！ 



溫馨提示：
-由於個別人仕體質不同，所以大家記得煲之前了解下自己，如有疑問，請先向註冊中醫查詢！
-煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！