22 December 2017(FRI)
成日都聽啲朋友仔講話飲天麻燉魚頭湯可以祛頭風兼治頭痛,我當然係好想試下啦,因為我都真係成日都頭痛,有時連食止痛藥都冇效,所以頭痛絕對係我C穴。
想就想左好耐,不過一諗起啲藥材同埋個大魚頭,就怕係好難整,所以一直都未有去行動。早前去小店入貨時,見佢有一包包嘅湯包,同老板娘吹吹水之後,原來都好似唔係好難,所以我就買左一包湯包,之後去街市買個魚頭,試下燉嚟錫下自己啦~
魚頭一個、川芎三錢、白芷三錢、天麻三錢及薑數片~
將所有藥材浸洗備用~
魚頭洗淨後對半切開,之後用熱油爆香薑片,再將魚頭稍微煎香~
將所有材料放入燉盅內,然後加入1L滾水~
放入電子燉盅燉3小時~
最後加少少鹽就可以飲啦~
坦白講,一打開個燉盅嗅到嗰一陣藥材味都真係有啲驚,因為嗰一陣味都真係幾.......,但原來入口又OK,係就係有少少藥材,但又唔難飲哦,所以煲起嗰三碗湯同埋個魚頭就做左我嘅午餐,真係超級豐富呀!
不過店主姨姨話飲一次作用唔會太大,建議我一個月大約飲三次(生理不適就唔可以飲),咁就對祛頭風應該有好大改善。好啦...就等我試下,希望真係可以對頭痛有幫助啦!
溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!
沒有留言:
發佈留言