【玩VR迎聖誕】聖誕全城HOHOHO

25 December 2017(MON)

聖誕節就當然要去玩，一早約好左幾位好友，打算三個小朋友齊齊入去過開心聖誕。不過因為小小豬病左好幾日，為免佢抵抗力差去人多地方，咁就當然唔可以去玩，但又約好晒朋友，所以就我同兩個妹同好友齊齊玩返一個下午啦(辛苦老公幫忙照顧了，俾我放假一下)~

不過....阿Q啲諗，其實小小豬入唔到嚟玩都唔算好大損失(當然佢係勁想去兒童天地玩)，因為今年海洋公園聖誕全城HOHOHO係以VR做主題，將有全港首個VR過山車，仲有兩大VR遊戲，年齡限制都要七歲以上兼有130CM，小小豬都未有咁高，所以佢入嚟都係陪我玩呀！  

雖然我都係滿心期待玩VR，不過一入場見到有好多精靈朋友同大家SAY HI，都已經感受到超強聖誕氣氛呀~ 

仲有愛神小天使周圍同人玩添~

今日仲有兒童合唱團唱聖誕歌呀~

嘩...聖誕節又點少得同聖誕老人集郵呢，不過聖誕老人就好識攪氣氛，影影下相會大叫HOHOHO，真係有少少俾佢嚇親添...哈哈哈~

仲有依個冬日浪漫花園，今日就等我悶少少，係缺少小小豬情況下，嚟一個一個人的浪漫啦~

之後我地就向動感天地進發，去睇【VR森度行】以360VR影像體驗熱帶雨林民俗生活同大自然美景~ 

場次係有英文同國語選擇，另外需要預早拎入場卷呀~ 

一入到場就拎齊VR用具等待開始啦~

坦白講，VR一向都唔係我杯茶(因為睇得耐都真係會頭暈)，雖然個VR森林都OK，不過....我嘅目標係VR過山車，所以睇左半場就冇再睇，留返啲精力去玩過山車啦~

終於嚟到我最期待節目，唔知邊玩過山車邊VR會係點呢~

同表妹滿心歡喜行埋去，點知.......原來要排最少120分鐘，一睇見過時間就真係有點驚。最後都係決定唔好為一分鐘就排120分鐘，所以我地都係放棄了。雖然係有點失望，不過邊個叫我地聖誕節咁好嘅日子入嚟，係人多啲啦~

之後我地就匯合返朋友們，齊齊玩機動遊戲同睇動物，路過我地仲睇左【企鵝粉絲過聖誕】巡遊添~

原來動感天地都有士兵同我地玩~

除左玩，今年仲有【海洋公園x Pinkoi聖誕市集】，聖誕主題市集入面有好多都係本地人氣設計師原創設計精品，都有好多唔同種類呀~

同朋友們玩左大半日，其實都幾享受兼開心，不過都係時候我要早少少走，要返去睇下小小豬先安心嘛~

話說我回家之後，小小豬問我今日玩過乜，咁我就當然如實報導。佢不單止沒有扭計，仲話知道我玩得開心佢就開心(幾時咁識講嘢)。為左讚賞佢咁乖仔，所以等佢完全好返晒之後就帶佢嚟玩啦！