前幾日同老公家人屋企人出街食飯，老公一見到碗紅豆沙糖水就好似好有感觸咁，攪到成村人都以為我冇煲過咁，真係激C我。
其實我又唔係冇煲過，只係N年冇煲啫，有見及此我就即刻買齊材料，煲返個蓮子百合紅豆沙俾佢先得~
其實我前都真係煲過兩次，不過嗰兩次火喉都未到家，而且我自己又唔太好紅豆沙，煲左一鍋又食唔晒好傷我嘅自尊心嘛，所以就冇再打算煲。既然今次有人曲線投訴，所以就煲返一次嚟威威啦！
由於我都只係打算煲俾老公飲，所以份量我係少左，依個煮成大約三碗啦！
材料：紅豆200g、果皮1片、蓮子及乾百合各15g及冰糖隨意~
洗淨紅豆，浸水六小時以上，我就放入雪櫃浸過夜~
果皮浸軟刮囊備用；蓮子洗淨，記得要除去那條黑芯；乾百合浸水~
隨水1500ml，然係加入瀝水嘅紅豆及果皮~
加蓋以大火煲滾，轉小火煲1.5小時~
倒入蓮子及乾百合轉中火煲10分鐘~
再轉小火煲30-45分鐘至紅豆腍~
依個時候就可以準備一個篩，將約一碗紅豆放在篩上，然後用湯殼把它壓成泥，倒回紅豆水中(依個步驟就可以令紅豆沙增加沙嘅感覺)~
然後隨個人口味加入適量嘅冰糖~
加蓋轉中火煲多10分鐘~
熄火焗10分鐘就食得啦~
我落足材料加全部嘅心機，個味道就當然唔差，而且今次都總算叫做起沙，即係成功煮到一個靚紅豆沙，真係幾有滿足感呀...哈哈哈！
不過話時話，煲紅豆沙又真係要比煮其他糖水落足心機，因為要好小心睇住個火，唔好俾佢黐底，又唔可以煲乾水，真係少啲心機都煮唔到。我煮嘅過程大部分時間都係廚房渡過，都真係幾悶呀！不過見老公食得咁滿足，所以都OK啦，但...........間唔中一次半次好啦，下次想食都可以考慮再去酒樓食呀...哈哈哈！
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言