【去公園取西經？】西遊記主題嘅鳳德公園

11 JANUARY 2017(WED)

之前聽朋友仔話黃大仙有個好特別嘅公園，見嚟開黃大仙，所以就帶小小豬嚟鳳德公園睇下有幾特別啦~

鳳德公園有幾特別？其實佢地就係以西遊記為主題而建成，公園內大部分設施及環境都係圍繞著西遊記故事嚟設計，香港又真係好似冇乜依啲有主題嘅公眾公園哦！

鳳德公園就係黃大仙祠附近，由地鐡站行去過去大約十分鐘就到啦~

 

睇佢地個地圖就知有幾特別，全部地方都係用西遊記入面嘅地方名呀~ 

 
一入到公園就可以見到兩幅大壁畫，雖然唔可以講得上精美，不過就清楚嘅講述西遊記部分內容，望住佢地就令我即刻諗起"張衛健"依個孫吾空。 

當然小小豬就唔多識西遊記依個故事，所以我就從中慢慢講少少俾佢聽，好一個親子故事時間呀...哈哈哈~

 

第一個目的地就係孫吾空嘅花果山~ 

 

花果山入面就當然有水簾洞~

 

估唔到細細地嘅小瀑布又幾靚，小小豬仲不停研究啲水係點上去，真係俾佢笑C~ 

 

之後我地就繼續向前行~ 

 

首先嚟到五指山~

 

原來每個山嘅出口就可以連接唔同嘅康樂設施，主要都係俾啲成年人使用，不過有得玩小小豬又點放過，又嚟玩返轉先~

 

嚟到火焰山，唔算特別，只可以當係一個小佈置啦~ 

 

仲有一個水晶宮~ 

 

我同小小豬都齊齊研究左好耐，都好想知依個位置有咩特別，終於俾小小豬發現左有一支紅色嘅捧係石上面。依個時候又到係我解說之時，將依個定海神針變成金剛捧嘅部分節錄地講俾小小豬聽啦~ 

 

行左一轉，又聽我講左少少西遊記故事，就係時候俾小小豬放電，因為有一個由三部分組成嘅大型遊樂場呀~ 

 

有得玩小小豬當然就係緊係最開心啦(當然....我仲開心，因為小小豬全程一邊行就一邊問我個故事發展，我就慢慢講俾佢聽，佢去左玩遊樂設施，我個咀終於可以休息一下啦....哈哈哈)~ 

 
雖然依個鳳德公園唔算好新，但我又真係覺得幾特別，可以吸引到小朋友對西遊記依個中國故事嘅興趣，個原意又真係唔錯呀！ 其實中國神話故事都有好多，如果可以有更多依啲特式公園可以推出，等小朋友邊玩邊了解各故事，都係一個唔錯嘅活動呀！

 

**我地的FACEBOOK PAGE，齊齊來交流親子。育兒。烹飪啦**