【好味涼浸浸】自家制菠蘿雪葩

9 JULY 2016(SAT)

我一向都幾鐘意食菠蘿，但自從沖繩之旅後就更加鐘意食，突然間心血來潮好想食，所以就買嚟整涼浸浸嘅自家制菠蘿雪葩，等我地母子為食一番啦~
 
其實係沖繩真係食左好多菠蘿，就連早餐都有得飲鮮窄菠蘿汁同大大粒菠蘿，仲有幾餐嘅甜品都係食菠蘿，仲要啲菠蘿勁甜又好味，可以話食極都仲好想食！

再上依排天氣熱熱地，小小豬食雪糕嘅次數都真係密左好多，咁係夏天食雪糕又真係一件嘗心之事，我都唔太阻止佢。不過...始終食得太多都唔係咁好，所以我就諗到用菠蘿嚟整雪葩，既可以滿足小小豬食凍冰冰嘅甜品之餘，我又可以食菠蘿，一舉兩得呀！  

菠蘿雪葩其實係非常簡單，只係一個菠蘿加少少檸檬汁同蜜糖~

 

哈哈哈....由於我唔識整菠蘿，所以都係麻煩生果店姐姐幫我整靚仔，之後就將菠蘿切粒~ 

 

然後放入冰格雪大約一晚~ 

 

經過一晚冰極之後，菠蘿就會變得好硬啦~ 

 

依個時候就可以準備新鮮檸檬汁~ 

 

將菠蘿冰粒放入攪拌機~ 

 

加少少檸檬汁同蜜糖~

 

然後就可以打成雪糕狀，如果用手動攪拌器就可以方便啲，不過屋企嗰次就唔知去左邊，唯有就改用攪拌機，因為佢地嘅性質都係 差唔多，用嚟打到變雪糕狀。但就要留意用攪拌機的話，個底部嘅菠蘿粒粒就會卡住，打得唔嘅細滑身，所以就要手動郁一郁個位置再打多一陣，咁就可以滑身好多 啦~ 

 

咁多菠蘿粒粒就要分幾次攪拌，當所有菠蘿打至滑身後就可以放入盒~

 

再放入雪櫃雪多兩小時~ 

 

一個簡單又好靚嘅雪葩就完成啦~ 

 

個質感又幾似雪糕，加上我依個菠蘿又係熟透，所以真係好好味~ 

 

由於菠蘿水份比較重，所以汁多啲，食嘅時候就要快口少少，唔係會好快溶呀~ 

 

炎炎夏日，雪葩咪就可以涼快涼快，仲要係原個生果咁整，咁就唔洗怕肥之餘，又可以食得健康啲啲。除左菠蘿之外，其實用其他生果都一樣可以做到，啱晒大人同小朋友呀！  

**我地的FACEBOOK PAGE，齊齊來交流親子。育兒。烹飪啦**