【消暑化濕】消暑袪濕冬瓜湯

4 JULY 2016(MON)

夏天飲咩湯好，緊係一啲既可以消暑又可以袪濕湯水，最重要都係要清清地，所以冬瓜真係一個唔錯選擇。見街市啲冬瓜實在太抵了，四蚊就有大大舊，而且見店員係原個即開夠新鮮，所以就去買材料，煲返個消暑袪濕冬瓜湯啦~
 

見上次我用雲苓蓮子薏米南豆依啲材料煲袪濕湯，小小豬都飲得津津有味，好味嘅湯係唔怕飲，既然佢鐘意就再煲多一次啦，不過今次店員就教我加埋荷葉一齊煲，咁就可以袪濕消暑同時做到啦！ 

材料方面就有豬肉眼$40、冬瓜約一斤、蜜棗4粒(忘記影相..哈哈)；雲苓、蓮子、薏米、南豆及荷葉，藥材份量方面你同藥材店職員講大約幾多人飲用，佢就會幫你執份量啦~

 

瘦肉洗淨汆水備用，藥材就浸洗一陣~ 

 

冬瓜乾淨切件(記得切大舊啲，咁就煲完之後可以食埋啲冬瓜)，冬瓜皮、瓜瓤和瓜仁都唔清走，因為加埋一齊煲就可以加強消暑功效呀~ 

 

煲內放約3L水，水滾後放入所有材料~ 

 

待再次滾起時，先繼續用大火煲約15分鐘，然後加入冬瓜~

 

再轉慢火加蓋煲1.5小時~ 

 

最後加入少少鹽調味，就可以飲啦~ 

 
哈哈哈....同我預期一樣，小小豬都係鐘意飲依款湯，極度自動自覺咁添飲，見佢飲得咁樂意，真係人都開心啲，不枉我咁努力煲湯俾佢飲...哈哈哈！


溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

**我地的FACEBOOK PAGE，齊齊來交流親子。育兒。烹飪啦**