【免費體驗】VR父親節派對

11 JUNE 2016(SAT)

今日帶小小豬去上畫畫堂之後，我地就去九龍城廣場打算食午餐，無意中發現為左慶祝父親節，佢地有三個唔同種類嘅遊戲俾人免費體驗，有得玩我地當然唔放過，所以食飽飽之後就去玩啦~
 
其實VR之前係APM都見到有得玩，不過一見到要百幾蚊玩幾分鐘，真係好唔多抵，再加上一向我地都少俾小小豬接觸電子遊戲活動，所以就當然冇去玩啦。

我地食完午餐之後冇意中發現依張海報，咁剛好我地手上又有一張剛才飲茶碌咭單據，咁就貪得意帶小小豬去玩一轉啦~

 
原本都只係打算玩一個遊戲，不過小小豬見到又話好想玩埋其他兩個(但其實佢都係唔知玩乜..哈哈)，咁見佢今日上畫畫班時老師都有讚佢做得好，所以就破例一次俾佢玩嗰兩個VR遊戲。

就係依個時候，趁兩父子去排隊時，我就上去一樓麵包店隨意貫兩樣食物，由於玩遊戲單據係不限金額，所以我就用八達通分開俾兩次錢，咁咪有三張單可以去玩三次啦~

 

小小豬第一個玩嘅就係電動平衡車遊戲~ 

 

排左15分鐘左右，終於都到小小豬，佢一著上裝備就係度扮型仔呀~

 

其實要身高120CM先可以玩，但哥哥都好好人，年紀細嘅小朋友都俾佢地玩(之前有一個仲細個小小豬呀)，不過年紀較細嘅小朋友玩時哥哥就全程保護住，真係細心啦~ 

 

依個遊戲都有一啲小比賽，先踩一轉電動平衡車，之後就去拋圈圈~ 

 

再踩一轉電動平衡車返回目的地~ 

 

最後畫一張父親節圖畫就完成~ 

 

係指定時間內完成就可以有小禮物，當然.....小小豬咁慢就緊係冇獎品，不過有份幅父親節圖畫俾DADDY都好啦~ 

 

之後小小豬就去玩VR瘋狂過山車~

 

戴上VR眼鏡，再戴上一盤波波就可以玩啦~ 

 

遊戲玩法就係玩VR過山車時，企位係會郁動，要小朋友保護啲波波唔好拋下呀~ 

 

當然.....小小豬唔洗三下就已經全部倒晒，仲開始有啲驚，要捉住個欄杆。最攪笑係尾段，小小豬竟然尖叫起上嚟，佢話由好高跌落嚟，所以急唔住尖叫左出嚟呀。不過小小豬都話好好玩同好刺激，好似玩緊Space Mountain呀(哈哈哈...佢個心又掛住迪士尼啦)~ 

 

最後玩嘅一個遊戲亦都係我地排得最耐，其實一次過可以兩個人玩，每次都係五分鐘，都唔明白點解我地排左30分鐘先玩到~ 

 

唉..算啦...小小豬肯乖乖排隊，我都唔理咁多，總之最後我地都可以玩到就得啦~ 

 

小小豬話依個係空中戰機遊戲，佢話要射啲戰機，不過佢話依個麻麻地好玩，同埋話部VR眼鏡好重哦~ 

 

唔覺唔覺我地又玩左個幾鐘，雖然就好似悶左啲啲(指我呀)，不過小小豬就話玩得開心，仲話下星期要再嚟過，一定要再玩多次電動平衡車。

哈哈哈...小小豬始終都係鐘意玩車多過電子產品！(咁我都安心啲)

**我地的FACEBOOK PAGE，齊齊來交流親子。育兒。烹飪啦**