2016年6月3日星期五

【惹味之作】蜜糖香草煎豬扒

2 JUNE 2016(THU)

老細成日都話我煮嘅豬扒冇新意,就係佢依一句說話,我就好努力咁研究,終於就煮左依個非常惹味嘅蜜塘香草煎豬扒~

其實講起都有點難為情,因為我啲醃料早係肥豬做節目時,睇見佢成日用迷迭香、百里香同埋番荽,所以我都去買定啲打算跟佢煮。

不過....買左咁耐都係等到今日先用到,因為我成日都覺得醃豬扒係要一早醃咁先會入味,之前時間唔太夠,所以咪多數買現成嘅啦(又嚟俾懶惰藉口添)! 

看似好多材料,但其實都係幾樣,有豬扒、迷迭香、百里香、番荽、黑胡椒同埋洋蔥(漏左影相..真失敗)~
 
首先用油、鹽、黑胡椒、迷迭香、百里香、番荽醃豬扒最少一小時(我今次醃左三小時),份量方面就因應個人口味嚟加減~
 
醃嘅時候記得要留意豬扒兩面都要加入醃料呀~ 
 
洋蔥切片,我今次我都係用左紫洋蔥,因為炒出嚟係會甜啲呀~ 
 
首先將豬扒煎至約7成熟,然後剩起備用~ 
 
洗乾淨鑊之後落少許油爆香洋蔥~ 
 
待聞到好香嘅洋蔥味之後,就可以加入豬扒再煎多一陣~ 
 
之後再加上蜜糖不停炒,等每一塊豬扒都有蜜糖包圍住。依個時候都係要小心同快手,因為蜜糖亦都係好易燶呀~ 
 
就係咁好似好簡單嘅蜜塘香草煎豬扒就完成啦~ 
 
其實我一向都好少煮煎嘢嘅餸,因為我嘅煎功唔好,成日都好易煎燶,不過今次我自覺又煎得幾靚哦,都冇乜燶呀....哈哈哈~ 
 
初時我都有丁點擔心兩位老細唔太鐘意嘅香草味,估唔到佢地又幾鐘意,仲話比平日食一早醃好晒嗰啲仲好味呀(緊係啦...自己醃可以落重手啲,當然係夠味啲啦)! 

屋企仲有醃料,所以應該好快又會要煮多幾次,成功嘅餸當然要煮多啲,等我自己多啲滿足感,亦都多啲正能量嘛!



**我地嘅FACEBOOK PAGE,齊齊嚟交流親子、玩樂、烹飪啦**

2 則留言:

  1. 請問可在那裏買到香草?

    回覆刪除
    回覆
    1. 我係專買醃料嘅小店買的, 不過我曾經見過超級市場都有, 你可以睇下呀~

      刪除