Checklisted Beauty 《清單美人》

24 NOVEMBER 2015(TUE)

我地屋企嘅圖書量都真係唔嘢少，加加埋埋都應該有過百本，已經準備要買多個書櫃嚟放佢嘅圖書了。

謝謝公關姐姐送俾小小豬嘅小禮物，等我地嘅閱讀小天地可以多添一本圖書啦~

我家教育部部長(即係愛豬號DADDY)對買圖書一向都唔會手軟，因為小小豬都算係一個鐘意閱讀嘅小朋友，平時都會自動自覺去找圖書睇。

鐘意閱讀係一個好習慣，所以就算夜晚去左街街遲返屋企，每晚都習慣要有故事時間。等小小豬養成習慣之餘，希望透過唔同嘅故事，可以等小小豬明白唔同嘅道理。

Checklisted Beauty 《清單美人》作者Libby Lam為左佢兩位囡囡，毅然放棄高級管理職務，致力創作兒童故事，陪伴小朋友成長。故事內容同所有插圖都是由Libby一手包辦，靈感都係來自兩位囡囡添呀~

坦白講，我嘅第一個印象係.....女仔圖書嚟哦，會唔會唔啱小小豬呢？佢會唔會睇唔明呀？

不過當我自己睇左一次之後，覺得故事個內容係好正面，唔止啱小朋友，就連我地大人睇左，都有得到啲反思~

故事講述十歲的主角AZURE係同輩及生活環境壓力下，以為要迎合社會所謂漂亮標準，才能獲得認同，於是盲目追求一式一樣的外觀，逐漸變得隨波逐流，迷失自我。

幸好，AZURE有家人嘅愛護同支持，同時亦找到自己的興趣和愛好，有機會發展天賦長處。因此，她能從錯誤中領悟，重踏自信之路~

故事係希望帶出小朋友灌輸正確嘅價值觀，靚唔一定係睇外表，亦都唔洗在乎其他人嘅眼光及認同，只要保存自己個性，找到自己嘅長處，就係真正嘅靚~

冇錯....正確嘅價值觀係好重要，尤其依家整個社會真係咩都鐘意比，係咪人地做咩我都就要跟住去做先啱呢？真係唔止小朋友，我地大人都真係都要認真考慮依個問題。

其實「天生我材必有用」，每個人都有屬於佢自己長處，歌都有得唱『因有自信...所以美麗...使我自卑都放低』所以做人最重要係有自信，唔好盲目去跟風，好好發揮自己優點先係最漂亮呀！

 

More Information :
Website：http://www.checklistedbeauty.com/
Facebook：https://www.facebook.com/ladylibbysart/

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

龍脷葉瘦肉湯

23 NOVEMBER 2015(MON)

尋日係農莊見到有婆婆擺檔賣龍脷葉，就啲龍脷葉又幾靚，加上小小豬又仲有啲痰同咳，所以就買一份嚟煲俾小小豬飲啦~

其實我之前都試過買龍脷葉嚟煲過涼茶俾小小豬飲(按此重溫)，佢都好鐘意飲呀！

原本我都打算照樣煲俾小小豬像，點知當我俾錢時，那位婆婆話咳嘅時候千萬唔好加蘋果，如果唔係仲咳呀。即時教左我用龍脷葉、南北杏同蜜棗煲豬肉湯，佢話簡單得嚟又有效，好好啱小朋友飲。

雖然婆婆講到咁利害，我都有打算跟佢依個嚟煲。不過....始終都係上網搵下啲資料，咁好似安心啲啲。原來婆婆教依個湯係民間用作治療傷風咳嘅食療湯，一般傷風咳嗽之外，亦可作為氣管敏感所致之咳嗽，或者作哮喘之一種輔助性食療法。

嘩...講到咁利害，當然要即刻買材料煲啦！

龍脷葉一份$10、豬肉眼瘦肉$30、 蜜棗3個、南北杏少少及薑1片~

龍脷葉、南北杏、蜜棗一齊洗淨，豬肉後洗淨汆水~

煲內放約1L水，然後加入薑片(依個份量約可以有六碗湯)~

待水滾後將所有材料加入~

水滾後轉用慢火煲約一個半小時~

最後加少少鹽調味，就飲得啦~

雖然只係簡單幾種材料，但又真係估唔到啖湯又幾清甜，飲完喉嚨又幾舒服哦，小小豬又嚟飲左兩大碗呀！

不過，止咳方面又好似未見有太大效用，小小豬都仍然係有啲咳。老公話：唉....神湯咩，飲一碗就好返晒！

咁又係哦，所以等我過多兩日再煲過，煲多啲...飲多啲....好過食西藥嘛！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

初到天水圍綠田園

22 NOVEMBER 2015(SUN)

今日陪老公屋企人參加屋苑嘅一天遊活動，其中一個活動地方都可以話我想嚟好耐，因為可以有得玩水上單車，見朋友仔玩得好開心，緊係好想嚟玩啦~

其實，如果唔係同一時間有兩位朋友不約而同地講話嚟左依度玩水上單車，我想我都唔知有依個地方。哈哈哈...依度咪就係天水圍綠田園啦~

原本同流浮山食海鮮嗰度好近，基本上行前多幾個路口就到。流浮山間唔中都嚟，又估唔到佢地咁近哦！

我只係知有水上單車，睇個地圖都好似有好多嘢玩咁哦，不過....總係就有點殘舊嘅感覺呀~

我主要係為水上單車而嚟，當然第一時間就去玩依個啦~

原來都係幾貴，$80玩20分鐘，仲要自己計時，唔多唔少都有啲壓力。不過，既然一場嚟到，我都係為左玩依個，所以....豪少少玩一次啦~

由於小小豬腳仔短短，所以佢都踩唔到個腳踏，所以就由佢負責控制左右啦~

控制左船仔一陣，小小豬俾其他嘢吸引住~

當然唔係我啦....咪就係俾水入嘅魚仔吸引到，我地仲邊踩船仔邊餵魚添~

小小豬病左好幾日，日日都係苦瓜乾樣，好耐都冇見過佢笑得咁燦爛。所以話依程20分鐘都真係貴貴地，不過見到小小豬咁開心，都係值得呀~

玩左個貴遊戲，所以都平靜啲，有一個免費嘅竹園，係依個小小園地玩下捉迷藏，都唔錯呀~

小小豬仲學人扮拉車仔呀~

之後我地繼續周圍行~

仲去餵牛仔添，不過好明顯隻牛過飽，完全唔彩小小豬啲草哦~

其實沿路都有啲小遊戲攤位，坦白講.....強國風味勁濃，不過有得玩小小豬緊係想玩，見佢咁誠意拳拳，就俾佢玩下啦~

最後仲俾佢堅持到去玩渣動物車車添~

哈哈哈...最後我地又搵到個免費遊戲，就係玩高橋啦！依個大膽豬仲完全唔驚，成日都唔俾我企係後面扶佢，話自己大個仔哦，真係俾佢激C呀~

玩埋依個就差唔多夠鐘要走了，其實話行晒又唔係，但我地又真係仲有地方未行，都未算行晒整個綠田園。不過跟一天團嚟玩就係咁，時間都唔可以咁自由，唔緊要啦....最緊要係今日都算玩得開心嘛！

小小豬當然係意猶未盡，佢係回程時不停問幾時再嚟玩水上單車，又話下次帶多啲魚糧嚟餵魚，所以.....相信佢嘅音波功係會令到愛豬號DADDY好快再帶佢嚟玩呀....哈哈哈！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

試用：Wild Carrot Herbals 琉璃苣敏感系列

20 NOVEMBER 2015(FRI)

天氣一轉，唔好話濕疹豬仔要做好保護，就連我地大人都一樣要。就係依個時候收到Wild Carrot Herbals 琉璃苣敏感系列，啱晒依個轉季時候啦~

來自美國嘅天然有機品牌Wild Carrot Herbals，於2000年開創自家美容品牌，佢地對產品原材料的品質及衛生要求嚴格，而且經過有機認證，確保所有產品高度衛生。

琉璃苣籽身體潤膚霜~

琉璃苣籽油具有天然消炎和鎮靜紅腫肌膚的功效，適合敏感、濕疹、牛皮癬及非常乾燥的肌膚，甚至能改善關節炎。不含香氣，質地清爽滋潤，性質溫和，不含鄰苯二甲酸鹽及香料，遠離這些致敏原，對預防皮膚敏感很有幫助。

奶白色乳霜狀質地，看似都比較杰身，但都好容易推開~

我對腳一向都算係偏乾，亦都有好多乾紋，所以我就主要用佢嚟按摩雙腳~

另外，當我洗完碗之後，雙手都會特別乾，我都會塗少少等雙手滋潤一下呀~

我覺得都唔錯，可以話滋潤得嚟又唔會笠痴痴，而且感覺好快就俾皮膚吸收晒添！

琉璃苣潤膚霜~

成份一樣都係琉璃苣籽油，另含有藍甘菊及綠香桃木，加強鎮靜皮膚發炎功效。

質地都係同奶白色乳霜狀質地，但就冇咁杰身，所以同樣都係好容易推開~

我就比較鐘意用嚟晚上當SLEPPING MASK用，一星期三晚厚塗一層，輕輕按摩面部之後，等皮膚吸引一陣就去瞓覺。第二朝起身部都好似好水潤，而且仲覺得好滑好舒服添呀~

整體上效果都唔錯，依排天氣時冷時熱，我啲皮膚都冇咩紅、乾或者敏感情況出現呀！

 

 

More Information :
Website：http://gardenorganicshk.com/tc/index.php
Facebook：https://www.facebook.com/Garden-Organics-312299542266272/

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！