第一次足球比賽

25 MAY 2015(MON)

小小豬今日就有一個新嘗試，晨早八點未到就嚟到足球場，因為第一次參加足球比賽呀~

其實前幾日天氣都唔係咁隱定，所以我都打家輸數今次個活動係會取消。但朝早起身個天氣都好好，所以小小豬唔洗失望，可以去比賽啦！

係呀...由小小豬一個月前同教練報名開始，佢都已經好緊張又期待，成日都將個足球比賽掛係咀邊，所以如果今日活動取消，我想佢一定笑唔出呀~

點完名就開始去集隊，先去做下熱身先。嗰一刻小小豬就開始發傻，我從遠處就見到阿SIR唔同佢密密傾咁，為免加深影響小小豬情況，我都係決定企埋一邊，等阿SIR幫手~

好啦...比賽開始啦！其實比賽都係好簡單，踢三場每場就大約10分鐘。雖然經阿SIR訓話過之後，小小豬情緒都好左好多，不過都係悶悶不樂。但都總算佢好合作，肯追住個足球跑~

中場休息，謝晒嘅小小豬~

經阿SIR不斷鼓勵，到左第三場比賽時，小小豬心情好左好多，今次仲負責守龍門呀~

哈哈哈...依隻豬仔狀態回勇，好有姿勢都有少少實際呀~

三場比賽完結了，小小豬那一對都有獎呀(雖然好明顯都只係一個豬肉獎)~

阿SIR仲叫小小豬做隊長，負責拎獎杯添~

所有比賽完結時，阿SIR當然同小朋友勉勵一番，仲將個獎杯送俾今日表演較好嘅小朋友。其實今日小小豬表演真係唔太好，所以當阿SIR話將獎杯送俾小小豬時，我倆都覺得好突然~

阿SIR話雖然小小豬唔係踢得最好嗰個，但佢肯去堅持參與，又肯去追個足球，所以都俾個叻叻佢~

拎住一個屬於自已嘅獎杯，睇下小小豬幾開心。今次依個仲係小小豬人生第一個獎牌，所以我地一定要好好珍惜呀~

其實學阿SIR話，今次參加比賽都唔預佢地有啲咩好表現...入幾多球....踢得有幾好，只係希望佢地感受一下比賽目的同經驗。所以最初我都冇預小小豬可以有幾好，只望佢ENJOY個比賽。

雖然頭段小小豬都情緒唔係咁好，但好在後段可以返番來，加上阿SIR又讚佢，所以我都收貨啦，期望下次再參加比賽時可以有好表現啦！

不過話時話，今日依個獎杯同阿SIR向小小豬講那番說話，明顯對小小豬係一個好大嘅鼓勵，令佢嘅自信心增加左，同埋更加喜愛足球。

其實我覺得小小豬真係好幸運，因為可以跟到一個好好阿SIR，除左教踢足球之外，仲會好耐性地做埋心理輔導，同小朋友謂道理，所以小小豬一定要繼續俾心機學，唔好浪費阿SIR對佢地付出嘅心思呀！