大肥豬的生日禮物

15 JUNE 2015(MON)

大肥豬生日，真係除左我地兩口子去玩波波池之外(按此重溫)，都冇咩特別節目。不過，點都要去食晚餐嚟個三口子簡單慶祝啦~

原本我地有一刻魔鬼念頭，叫小小豬今日放一日假，我地齊齊去玩。最後當然係天使又嬴左啦，其實一早我都估到，因為一向好著緊小小豬學習嘅大肥豬又點肯呀...哈哈哈！

一向大肥豬生日都唔會要求買啲咩，因為佢都唔想為買而買，但今年就有所特別，大肥豬竟然話想買個鋼琴。唉...明眼人都知道大肥豬依個動作，都係為左小小豬。

自小小豬學琴至今，大大話話都差唔多五個月。雖然唔可以話小小豬學得好好，但都總算都有板有眼，都識彈到好幾首歌仔，而且仲越嚟越鐘意添。

再加上每次我地行大型商場時，大肥豬都一定帶小小豬去參觀琴行(其實係俾小小豬彈下琴)，小小豬每一次都會好興奮咁，揀個琴仔嚟彈幾首歌。

就係依啲原因，大肥豬話小小豬咁鐘意，又肯去彈，所以就買部返屋企，等小小豬可以彈多啲，學叻啲！

坦白講，我原本係舉腳般唔讚成，我地屋企有幾大呀，已經有張大書枱，如果再加埋個鋼琴，真係冇乜位行。但係大肥豬好堅決話位置係可以解決，只要我答應依個任務就交俾佢。再加上佢朋友有一部新新地嘅二手鋼琴可以轉讓，所以最後我都係心軟了，答應買嚟當係生日禮物啦！

都唔知係唔係教好時間，鋼琴係大肥豬生日當日送到，仲唔係佢嘅生日禮物？小小豬放學返到屋企見到都鋼琴時，佢都不知幾興奮，仲要即刻彈幾首歌添~

見小小豬咁興奮，最開心嗰個一定係大肥豬啦~

開心過後，我地就去帶小小豬去學琴，放學之後就三口子簡單食個晚餐一下啦！

生日又點可以唔吹下蠟燭許個願呢？大肥豬一向都唔"好"蛋糕，所以我就係餐廳叫左一客甜品，之後就自備蠟燭，插係個雪糕面等佢地兩父子開心一下~

依隻為食豬......其實今日都唔知係邊個生日，好似每一件事都係為小小豬而設咁。不過，一向愛豬如命嘅大肥豬又點會介意，小小豬開心佢就會比小小豬更加開心，為左個仔佢真係做咩都得呀....哈哈哈！