他是一隻敏感豬?

21 JUNE 2015(SUN)

今早同小小豬整西瓜雪條時，我竟然見到佢咀巴及咀角又有啲紅疹疹，OH...NO...濕疹朋友又嚟探佢啦~

回想起小小豬應該係大約四個月BB時開始有濕疹，雖然唔算係極度嚴重，但面仔總係會成日起好多紅色疹疹，睇見佢一熱時就會忟憎扭計起嚟，我地大人睇見都覺得佢好辛苦。我地好多方法都試過，都係冇進展，最後我就幫佢轉左飲豆奶，先叫做可以控制到，只要KEEP住皮膚滋潤，咁就好左好多。亦都因為轉飲左豆奶關係，由原本係中大碼B，短短兩個月就變為細碼B，嗰時都真係幾傷心，不過本著唔再起濕疹就已經好好啦！

到佢差唔兩歲仔時，見佢啲濕疹都叫叫做隱定啲，所以就開始轉返飲普通奶粉，同時佢食固體食物時，我地都俾佢食得好清，好似..雞蛋、牛肉、南瓜、海鮮.....等等，總之會引起敏感嘅，佢都唔食得。有時我都會諗....小小豬到依家仲係咁細細粒，係唔係關依啲事呢？

可能我地都算KEEP住食清啲，同埋本著大個仔身體好左就會慢慢有改善，依家小小豬啲濕疹都會間唔中都會有，但都唔算嚴重，所以我都唔會太擔心。(有時天氣唔好或者空氣質素差，都會引起濕疹呀)

其實常見於嬰幼兒及兒童的敏感包括:濕疹、皮膚敏感、食物敏感、鼻敏感、哮喘、過敏性結膜炎等，敏感症是指免疫系統對無害物質產生過度或不適當的反應，原來早期嬰幼兒敏感有機會，在將來會引發更多不同的敏感症。

某程度上我都覺得自己幾好，因為小小豬都只係有濕疹，如果佢再加多幾樣敏感，我都唔知點算好啦！

但....內心深處，我都有一點內疚，當初可能我係開刀關係，所以就比較難有母乳，再加上又唔識用咩方法可以催奶，所以小小豬就冇用過母乳餵餔，所以就唔可以減低敏感風險，濕疹依個壞朋友就好易嚟揀小小豬啦！(慶幸小小豬整體上都尚算OK，所以我都安慰返啲啲)

大家唔洗估估下，我唔係有左，亦都唔會有依個打算，因為一隻小小豬都足夠我用盡精力同時間，所以一個就夠啦！

今次係有感而發，就係希望各位新手媽媽或者準備懷孕嘅靚太，了解左小小豬嘅濕疹經歷之後，會留意到母乳重要性，盡努力為BB做最好呀！

我係網上見到有報導講預防敏感，大家有興趣可以CLICK入去睇下
。

誕後半年哺母乳防敏感
http://orientaldaily.on.cc/cnt/news/20150429/00176_090.html

順產餵母乳 減嬰兒敏感風險 75%家長指子女曾過敏
http://www.skypost.hk/%E6%B8%AF%E8%81%9E/%E6%96%B0%E8%81%9E%E9%A0%AD%E6%A2%9D/20150429/001/%E9%A0%86%E7%94%A2%E9%A4%B5%E6%AF%8D%E4%B9%B3%20%E6%B8%9B%E5%AC%B0%E5%85%92%E6%95%8F%E6%84%9F%E9%A2%A8%E9%9A%AA/175771

海洋公園@‎週末玩轉老大街‬

20 JUNE 2015(SAT)

話說早排收到海洋公園送俾小小豬嘅禮物，知道依家海洋公園舉行緊週末玩轉老大街活動，會有好多懷舊事物同埋經典巨星去左老大街，好想帶小小豬去感受一下呀。

不過，無奈近依幾個星期，唔係天氣唔好就係小小豬唔舒服，所以要最後一個週末先可以入嚟反轉老大街呀~

其實一嚟到老大街，我最最最想做嘅當然係同啲經典巨星集郵一返，我好想同筷子姊妹花、林亞珍仲有奇哥影相呀！

不過今日我地行左兩轉，都唔見佢地，但都唔緊要，因為搵到公雞哥哥、包租婆同女殺手影呀。咩叫做異性相吸，睇小小豬表情就知，叫佢同公雞哥哥影相就苦情樣，反而同女殺手影就笑得咁開心，佢真係人細鬼大啦...哈哈哈~

係老大街上仲有雜耍哥哥教小朋友玩添，不過小小豬就唔多熟手，有少少"論盡"哦~

相信係整個老大街最受歡迎嘅都一定係依一個小檔口~

因為有大大粒凍冰大西瓜呀~

由於小小豬話唔想食，所以我都冇買到，但見好多朋友仔都嚟食，都勁想食呀~

除左西瓜之外，都仲有好多懷舊涼果呀~

另外都仲有好多唔同檔口，賣懷舊特式小食呀~

係老大街上有唔同形式嘅傳統手藝，好似有麵粉公仔、糖畫、織草蜢，依家都真係好少見啦~

原本週末玩轉老大街‬節目係仲有街頭表演嘅，不過可能我地時間唔夾，行兩轉都等唔到表演，所以睇唔到呀，真係有點可惜。

嚟得老大街，當然唔少得探下嚟自澳洲嘅朋友仔啦~

雖然今日都係公眾假期，但今日入去睇樹熊嘅人唔多，大約排左20分鐘就可以入場啦~

哈哈哈...依個小小豬，睇真樹熊就睇一陣就話睇完，反而就走去玩個樹熊遊戲，真係俾佢激C呀(不過都只間唔中....由佢啦)~

我地留左係老大街都有好一段時間，小小豬開始都有點耐煩，因為佢入嚟海洋公園最掛住嘅就係企鵝，成日問住幾時去手搵企鵝..幾時去手搵企鵝，所以我地就應佢心意，上山搵企鵝啦~

企鵝館真係一個好地方，相信亦都係夏天時全個海洋公園最正地方，因為冷氣勁舒服。所以我都唔理咁多，由佢地兩父子慢慢睇，我就過下冷河啦~

嚟得依個區域，小小豬又當會放過玩GAME呀~

哈哈哈...傻豬仔仲未可以叻到拋到有獎，所以暫借旁邊嘅靚靚公仔作狀一番啦~

由於我地今晚要返奶奶屋企做節，所以都唔可以玩太耐，係山上都只係睇左企鵝同幾個小遊戲，之後就搭纜車落山去玩，去小小豬至愛嘅地方啦！

依隻豬仔真係好鐘意搭纜車，全程都靜靜地睇風景，真係好少見佢坐都咁定呀~

落到山下，小小豬最愛嘅地方咪就係兒童王國。一嚟到就自動自覺去排隊玩小青蛙啦~

上次嚟玩都要表姐佢地陪，今次竟然同我講：『我大個仔啦...唔洗MaMi陪，我自己去玩就得啦！』既然佢咁主動，當然順下佢意啦！

真係估佢唔到，依隻大膽豬真係一啲都唔驚，係上面仲笑得不知幾開心，仲連玩左三轉添呀~

仲有玩左一次小甲蟲，可能唔夠刺激，豬仔玩左一次就話要玩其他遊戲啦~

最後玩埋轉轉木馬，好攪笑地職員哥哥以為小小豬好細個，一定要我企係旁邊睇實。唉...其實佢都就嚟五歲，點解仲係咁細粒呢~

玩完兒童王國，我地就離開海洋公園了。臨走時我都不忘集郵一番~

當我地離開時，已經見到周圍都有好多夏水禮佈置，好多LINE呀~

見到啲佈置實在好想可以入去玩返轉，好想快啲開幕，快啲帶小小豬入嚟參加夏水禮玩返轉呀！

 

More Information :
Website：http://www.oceanpark.com.hk/
Facebook：https://www.facebook.com/hkoceanpark?fref=ts