可憐的病病豬

1 JANUARY 2014(WED)

踏入新一年嘅第一天，就已經發生一件好唔開心嘅事，就係小小豬變左做一隻可憐的病病豬，要去睇醫生呀~

今晨清晨時份，小小豬突然間咳得好利害，之後仲嘔左出嚟。開頭我地都以為係因為多痰，所以先導致嘔，既然依家嘔左出嚟都應該舒服啦，所以我地就繼續槑小小豬瞓返。

點知隔一陣又嚟過，總之就係短短兩個鐘內都嘔左三次，睇見小小豬嘔嗰辛苦樣，都真係肉痛C我地啦！

以為小小豬好左啲，都可以再瞓到九點幾，點知起身飲左少少水同食小小麵包之後又再嘔過。我地見事態嚴重，所以都帶小小豬返去睇個家庭醫生。

正當我地搭緊電梯時，小小豬又嚟嘔過，今次仲係嘔黃膽水，見小小豬個辛苦樣，真係寧願嘔嗰個係我呀！

睇左醫生之後，醫生話小小豬係輕微腸胃炎，食藥就OK，就連針都唔洗打。

腸胃炎...真係諗嚟諗去都唔明點解小小豬會有腸胃炎，因為我地食乜佢就食乜，極其量都係食多我地兩粒糖糖，唔通就係依兩粒糖糖出事？

不過，唔理咁多啦，依家開始要更加小心小小豬嘅飲食，希望唔好再嚟腸胃炎啦，因為見佢咁辛苦真係心都痛晒呀！