工展會

30 DECEMBER 2013(MON)

每年工展會小豬爸同小豬媽都一定入去趁吓熱鬧，有時都唔係知有買平嘢(因為真係唔覺得係特別平)，都係抱住每年都入去行吓八卦吓咁。

上年小小豬都有陪伴一齊入場，今年當然都唔例外，趁仲係假期，所以我地又一齊入場行吓啦~

今日都已經係平日，仲要係一點幾，估唔到都仍然有咁多人。不過，雖然係人多，但大家都好守規矩，只係某啲有得試食攤位比較多人，但整體上都係行得OK暢順呀~

哈哈哈...因為我地都知道係會多人，加上又係會行一陣時間，所以就帶埋BB車去，等小小豬有得坐定定睇嘢。不過其實原來帶BB車去都係有另一個作用，就係我地將買返嚟嘅嘢全部鉤晒係車上面，唔洗拎得咁辛苦嘛~

入嚟工展會我地必做動作，就係去食乳酪雪糕。睇吓為食嘅小小豬食得幾狼C~

雖然係心急狼C，不過佢今日好乖仔，主動餵我同小豬媽食呀~

原本都冇PLAN買啲乜，不過行吓又買啲，行吓又買啲，最後我地都買左好多戰利品呀！當然唔係全部都係我，有一半係小豬媽嘅~

係咁多戰利品當中，我最有興趣就係嗰兩盒麵包PRE-MIX，唔知我會唔會成功整到呢？哈哈...真係好緊張呀，等我搵日揀個良辰吉日嚟開工啦！如果成功都時再出POST出大家分享啦！(當然如果一段時間都唔見我有分享，就知我係失敗，唔好問我啲傷心事呀...哈哈哈)