溫馨的除夕夜

31 DECEMBER 2013(TUE)

今日下午陪小豬媽去睇中醫之後，我地就返左我屋企。先同小豬媽簡單買少少餸，所以我地除夕夜嘅節目就係一家打邊爐，過一個溫暖嘅除夕夜啦~

從以上張相可以睇到，其實男仕對鏡頭嘅敏感度係冇我地女仕咁利害，睇吓小豬爸同大肥豬就知道啦...哈哈哈！

講返正題，由於時間有限，加上我屋企附近個街市又唔算有好多豐富嘅食物買，所以都只係簡單嘅打邊爐。不過，大家都一樣食得好愉快。其實計我話，只要一家人開開心心，咁食乜都會一樣係好開心呀！

一向鐘意痴住小豬媽嘅小小豬又點會放過小豬媽呀，所以晚飯過後，全程捉住小豬媽陪佢玩。個擦鞋豬攬到小豬媽實一實，睇佢地玩得幾溫馨~

依個小小豬仲唔俾小豬媽走添，要小豬媽留係我地屋企瞓，真係俾佢笑C呀！最後我地送到小豬媽佢地出電梯口時，小小豬嗰一個依依不捨嘅眼神，攪到我都有啲啲妒意添，點解小小豬冇對住我做依啲表情呀？冇辦法啦...邊個叫我係做奸呀...唉！

雖然係有少少妒意，不過我覺得小小豬錫小豬媽係應該嘅小豬媽都係一樣勁愛小小豬嘛！