喜氣洋洋去睇喜洋洋

26 JANUARY 2014(SUN)

今日我地三口子又有節目，就係一齊去睇喜洋洋啦~

首先要再一次多謝Yes-Parents邀請，我地三口子就可以去睇《喜羊羊與灰太狼大電影6 - 飛馬奇遇記》優先場~

今次依個優先場舉辦地點就有少少特別，就係去北角新光戲院~

新光戲院俾我感覺都係睇粵劇，我好耐之前都陪小豬媽嚟過睇粵劇，不過睇電影都係第一次，加上今次又係睇卡通片，所以感覺就更加特別啦~

由於場內係不設劃位，所以都早左少少嚟排隊入場。好在，在場負責人見都有好多大小朋友係度排隊，所以早左俾我地入場，等我地唔洗排咁耐！

雖然今日都幾多人，不過我地都搵到個靚位睇戲呀~

由於係優先場，所以在場都有好多小朋友一齊睇，可以話在場小朋友係多過成年人呀！我都係第一次同咁多小朋友一齊睇戲，不過個氣氛又真係唔錯，係啲開心笑位會聽到好多小朋友一齊笑，感覺都真係幾好呀！

老實講，依套電影對成人嚟講都可能唔係太啱，因為劇情方面又真係有啲簡單同埋有啲唔合情理。

不過對小朋友嚟講就應該唔錯，因為我係劇院入面都聽到好多小朋友嘅笑聲，相信佢地就十分喜歡啦！