年三十的迪迪尼

30 JANUARY 2014(THU)

今日係年三十，難得又係可以入迪迪尼嘅好日子，所以我地三口子就趁食圍年飯之前，入去迪迪尼玩一轉啦~

上網睇啲朋友仔話上年嘅年三十都唔係好多人，所以我就滿心歡喜咁以為可以玩多幾樣嘢啦！

點知一踏入迪士尼地鐵，就已經心知不妙，勁多人(當然係內地人)，心入面都已經打左個突。不過都已經嚟到，就繼續我地嘅行程啦~

先係啲SHOP行吓涼吓冷氣攪攪事先，因為天氣實在太熱啦~

原本今日入嚟其中一個目的係同MICKEY影相，不過條龍實在長得有啲恐怖，唯有放棄依個念頭。同唔到MICKEY玩，就只好同依個公仔影吓頂住先啦！

估唔到小小豬勁鐘意依個位置，仲玩到唔願走，因為有得打鼓嘛~

玩左一陣，係時候夠鐘睇巡遊。上次小小豬係巡遊時踏出左第一步，肯出去玩，所以今次我地都好期待小小豬出去一齊跳舞啦！

哈哈哈...小小豬同上次一齊，工作人員未收佢就準備出定去先呀~

好陶醉咁玩彩帶呀~

開頭工作人員係唔俾家長一齊出去，所以開頭都係睇到小小豬嘅背面。不過我見有好幾位家長都有出去同佢地小朋友影相，所以我就好唔知醜咁走出去同小小豬影相啦！

依幾張相固然係影小小豬玩彩帶時個情況，不過另一亮點就係大肥豬，睇吓佢見到小小豬肯出去同小朋友一齊玩彩帶個開心樣，好一個慈父呀~

睇完巡遊我地就去搵DONALD影相，個傻仔見到DAISY就即刻衝埋去攬到實呀~

影完相都打算去同小小豬去馳車天地揸車車，不過就真係有啲嚇人，玩依個最少要排成90分鐘，見到咁都真係排唔過啦。最後就係依部車車玩幾吓就算啦~

原本都好想去玩飛碟同小小世界，不過真係勁多人，比起平日條人龍真係長好多，所以都真係唔敢去排。之後我地就再行多一陣SHOP，然後就走啦！

係地鐵站見到小店舖開左，小小豬見到好多公仔跳舞，佢又跳埋一份呀~

真係完全冇諗過會係咁多人，所以都真係有少少失望，玩得唔盡慶呀！

希望過左個新年之後，少左一排強國嚟嘅朋友，咁就可以玩得輕鬆啲啦！

Pixture玩自拍

29 JANUARY 2014(WED)

去玩自拍真係可以話係一個新興嘅活動，因為睇介紹都見開左好多間。繼上次去左SNAP自拍體驗館開心玩左一轉之後，今日我地又去左PIXTURE玩一轉啦~

十二月初先玩過，雖然我係勁鐘意影相又覺得好好玩，不過都冇PLAN咁快再去玩自拍。但小豬媽話新年將至，好想同小小豬一齊著住新年衫影一輯賀年相。就係因為依個原因，所以就BOOK左上去PIXTURE影一轉！

雖然都玩過一次自拍，兩間公司嘅形式都係差唔多，不過依個REMOTE相對就難按少少，要有少少技巧，所以我地就先影幾張WARM-UP吓個人同埋練習吓用個REMOTE先~

好啦...各人都開始入狀態，所以就搵賀年衫影相啦！不得不提，我同小小豬套親子賀年衫，係小豬媽見我地一齊去影靚相，為我地準備嘅驚喜禮物嚟，仲要上到影樓先拎出嚟，真係只可以歌出嚟：世上只有媽媽好~

超鐘意依兩張，小小豬好少同我影相係咁開心，笑得咁燦爛，真係要多謝小豬媽同LULU妹幫我引依個百厭豬呀~

影完賀年衫之後，我就同小小豬變身小青蛙。哈哈...係呀，依套就係小小豬聖誕表演嘅服飾，我見上次都唔係影左好多相，加上又想係影樓影吓，所以就帶埋去影啦！

小小豬變私伙小青蛙，我同LULU妹就換左場內提供嘅比卡超同恐龍玩吓啦~

之後就小青蛙SOLO啦~

因為我地用左比較多時間影賀年衫，所以小青蛙都只係影左唔係好多呀！

去影樓影過都好幾次相，不過今日係小小豬最有狀態嘅一次，影左好多張我地都好鐘意嘅相，所以都要俾個GOOD佢呀！

今日都真係好好玩，短短兩個鐘我地就影左五百幾張相。唯一就係因為大肥豬請唔到假，所以冇得同我地一齊影，影唔到三口子嘅相，有少少可惜呀！

不過唔緊要，依家嘅自拍影樓又抵，仲要質素都好好，再加上我依個影相狂，所以一定會再有機會嚟玩過呀！