聖誕日遊海洋公園

25 DECEMBER 2013(WED)

之前都冇乜點PLAN聖誕節當日去邊，正當我仲諗去邊玩時，大肥豬就話難得今日天氣唔太凍又有太陽，我地張海洋公園全年証又可以入場，雖然都預左今日會好多人，去感受吓聖誕氣氛，所以就入海洋公園行一轉啦~

我冇預計錯誤，今日真係勁多人，除左好多內地人之後，原來今日有某銀行包左夜場，所以成個海洋公園都係人。不過，雖然係多人，我地又唔玩機動遊戲，加上都只係打算入嚟行吓，所以都唔影響我地。

一入場小小豬例必睇一陣噴水池~

路過聖誕樹下，原來有合唱團表演唱聖誕歌，所以我地去聽吓啦~

小小豬真係好鐘意聽歌，佢坐定定又好留心咁聽呀~

聽完歌就當然要係聖誕樹旁影相啦~

不得不讚吓幫我地影相嗰位工作人員，佢好專業咁幫我地引小小豬，仲主動影左好幾張相，仲要係唔同角度，佢真係我搵咁多個影相嘅工作人員中最好嘅一個呀！

之後我地就搭火車上山，因為小小豬見完上次啲攡位遊戲之後成日都話好想再玩，所以今次我地又再玩啦！不過，其實啲攡位遊戲又真係幾貴，每一個GAMR都要$50，仲要唔易中，所以玩都有少少肉赤。大肥豬話今日係聖誕咪玩吓，話唔定可以中一個做聖誕禮物。

就係咁我地先嚟玩拋波波~

再玩拍青蛙~

當然...一向玩遊戲唔叻嘅我地係唔中禮物。不過，見小小豬玩得咁開心都OK啦！

我地就周圍行，影吓啲聖誕佈置啦~

原本都想去睇海獅表演，不過都實在太多人，都係唔排隊啦，留返下次唔係節日先入場去睇啦！

去搭纜車落返山啦~

例必玩吓賣生果同上電車~

玩左一陣，我地就去醫肚，之後再去聖誕樹下聽合唱團唱歌呀！

最後一個活動，聖誕節當然係要同聖誕老人影相啦~

原本想去睇嗰個聖誕馬戲SHOW，正當我地準備行去睇吓場次時，嗰位職員建議我地依家開始排隊，但當時離表演時間仲有成四十五分鐘。雖然都好想俾小小豬睇吓馬戲表演，不過要排咁耐又真係怕怕，所以最段我地都係冇睇到，同聖誕馬戲SHOW冇緣份了！

可能有包夜場關係，所以越晏越多人，所以我地都走啦！

下次入嚟再玩過啦！