四十個月大啦

10 DECEMBER 2013(TUE)

四字頭啦...小小豬40個月啦！

大肥豬買左兩套圖書俾佢，當係40個月&預早的聖誕禮物，睇吓佢有新圖書幾開心~

其實大肥豬都唔係專登買係今日買俾小小豬，只係佢今日LUNCH時行過書店見到先買俾小小豬~

丁丁當當圖書系列，第一輯嗰幾本我地之前都係圖書館借過返屋企俾小小豬睇，雖然都只係得幾頁，不過啲故事都好簡單易明，所以小小豬都好鐘意睇，有某幾本仲可以跟住故事內容講返俾我地聽。

就係因為小小豬有依個咁好表現，所以大肥豬就將兩套圖書都買晒俾小小豬，等佢可以慢慢咁聽多啲...講多啲，可以好好培養閱讀興趣之餘，亦都可以訓練小小豬說明能力~

睇吓個傻豬仔見到啲圖書幾開心~

已經急不及待要自己睇啦~

基本上每晚都一定要睇圖書聽故事之後先肯瞓。有時一早起身佢都會自動自覺坐埋去圖書櫃旁自己拎圖書睇，佢唔係玩玩吓咁睇，真係會好認真一頁頁咁邊講邊睇，有時仲會叫我坐定定，講個故事我聽添！

其實係大肥豬嘅努力培養下，由當初小小豬唔願意聽故事，我地有我地講，佢有佢周圍走，到左依家已經有閱讀嘅興趣同習慣。所以話小小豬有依一個有咁大改善，亦不得不讚賞大肥豬嘅功勞。

當然我地都仍然會KEEP住做，希望可以KEEP住小小豬依個良好閱讀興趣，因為有興趣閱讀，都佢小學時學習都一定有好大幫助呀。

雖然圖書館都可以外借，我地屋企都長期KEEP住有圖書館所借閱嘅圖書，因為大肥豬一有時間就會帶小小豬去圖書館睇圖書。

不過，總係覺得如果係自己擁有嘅，咁就會好似開心啲，所以如果有啱嘅圖書我地都會買返屋企，等小小豬可以隨時都有得睇嘛！

有時我會諗....如期送玩具俾小小豬玩，咁就不如送啲幼兒圖書俾佢，咁可以俾多啲鼓勵依隻愛閱讀嘅小小豬嘛！