為食豬返嚟啦

28 NOVEMBER 2013(THU)

返嚟啦...返嚟啦...依個為食豬返嚟啦~

小小豬一向都係為食仔，麵包...餅乾...糖糖咁佢都一定愛不釋手，一見到就一定要食。當然小小豬同一般小朋友一樣，都食飯都唔係咁大興趣，不過為著佢嘅為食，每一餐都會合作食一碗飯。

不過，唔知小小豬發生咩事，由上兩個星期開始就好似失常咁，每日嘅午晚兩餐飯都食得好"乖"，只係食半碗都要用好大氣力(我指係我用好大氣力，因為不停叫佢食，都幾勞氣呀！)

諗左好耐，都唔知係乜問題，係我煮得唔好食？不過之前都係食依啲嘢。食濟左？依個情況都只係食飯時出現，食其他嘢係冇問題。所以我都真係唔知發生咩事，都幾頭痕呀！

我依個擔心終於都開始釋放啦，因為由尋日開始，係我地冇乜做過特別事嘅情況下，小小豬慢慢正常返，仲比之前叻仔，因為次次都食兩大碗添！

睇佢食得幾得戚，見佢依個衰衰樣，我都安心晒啦~

小小豬要KEEP住繼續"曳"呀...哈哈哈！