萬眾期待嘅開學日終於都到啦！
講真，我真係由上星期開始都已經好緊張，始終小小豬都係一個比較慢熱嘅小朋友，新學校對小小豬嚟講真係好多新嘗試，班上同學仔比N班時多一倍之後，最大改變就係個語境，所以都真係比較擔心，唔知係新學校小小豬會點.......真係十萬個疑問呀！
由於係適應週，頭兩日仲可以家長陪，所以今日就由我同小豬媽陪小小豬一齊面對依個新挑戰啦(冇錯....小豬媽都係小小豬嘅重要人物，今日放新學校咁重要，當然都要小豬媽陪啦)！
依個返LOOK又好似幾醒目咁哦~
為左唔想令小小豬唔習慣，所以我地早左少少返學，等佢習慣一吓。開頭仲擔心小小豬要扭一陣計先肯入課室，點知佢一入到課室，搵到自己個座位之後，就識得自己去拎玩具玩啦~
玩左一陣，老師叫收玩具時，小小豬好乖仔咁自己收玩具，之後仲好安靜咁座定定等待上堂。睇見小小豬依個表現，我同小豬媽都好驚喜，因為完全冇諗過小小豬係一個陌生環境，可以自動自覺咁乖仔呀~
好啦....上堂啦！第一個環節就係由老師教同學唱歌仔，雖然小小豬都應該係聽唔明白老師講乜，不過因為係唱歌關係，小小豬都好專心咁留意老師，仲有跟住老師拍手同搖身添！不過，一去到講故事時刻，小小豬就即刻有啲不安表現，不停要"痴"住我，最後都係要我陪住先可以乖乖咁繼續上堂。
之後就去到英文環節，由一個外籍男老師負責，老師會拎個吉他邊彈邊同小朋友一齊唱歌，可能係英文再加上唱歌關係，小小豬又開始專心起嚟，仲好開心咁跟住老師動作添。
排洗完之後，就到最重要一環，就係食茶點，有得食嘅小小豬當然係好開心，仲古靈幣怪添~
依一個茶點時間，令我覺得小小豬真係大個仔左好多。因為之前N班，小小豬一見到啲食物，佢就會即刻急不及待拎嚟食。今日小小豬見到茶點係佢面前，都可以好安定地等老師唱左茶點歌，老師叫食時先慢慢拎起啲食物嚟食，真係唔同晒呀！
今日返到學校先知道，原來佢地所有事都要學生自己做，就連去洗手間要自己，冇工友姐姐幫忙。聽到啲時候都幾驚小小豬自己一個攪唔掂，我都知我依個想法係好"獸怪"，不過小小豬又真係一個好"小朋友"嘅學生，都真係唔到我唔擔心嘛！不過，擔心過後諗返，其實依個咪又係一個好機會訓練小小豬，等佢學多啲唔同嘅嘢，咁就可以獨立啲，未嘗唔係一件好事。我應該要俾多啲信心小小豬，同埋相信老師係一家會幫小小豬嘛！
整體上今日小小豬第一日返學都叫做OK，不過可能係聽唔明老師講乜，所以專注力就差啲，希望小小豬快啲可以適應依個新嘅學校環境，聽得明老師講乜就唔洗攪事啦！
話時話，除左小小豬之外，相信我都要適應，因為老師同家長交談都係會用國語，真係要同小小豬一齊努力，學習好國語先得啦！
小小豬個FACEBOOK專頁，你今日LIKE左未呀~
沒有留言:
發佈留言