病左都有一星期嘅小小豬,雖然都已經叫做冇再發燒,仲開始精神返晒,玩嘅時間都有返精力同笑容。不過佢嘅鼻水同咳都好似仍然未有改善,仲係不停咁流,攪到個鼻哥仔都紅晒,所以都係要再去睇多次醫生,希望可以收到啲鼻水啦!
由於之前係柴灣睇開嗰位醫生好似唔多夾小小豬,睇左幾次之後再食佢啲藥都好似冇乜效,加上又成日開抗身素,我又唔係咁鐘意,所以我地都決定轉一轉,最後經小豬媽朋友介紹,去左銅鑼灣睇嘅兒科專科。
我星期一請左半日帶小小豬去醫院,真係唔敢再請,剛好LULU妹又放假,所以就由佢地負責帶小小豬去睇醫生。雖然有小豬媽係度我都應該好放心,不過都總係覺得好唔開心,點解我唔可以自己帶個仔去睇醫生?一諗到依點,內心只能感嘆一個字『唉~~~~』。
係出發前,小小豬話要打俾媽咪先~
可能依個係兒科專科,所以成個醫務所都有好多玩具玩,唔講仲以為係小豬媽帶左小小豬去玩冇去睇醫生。
睇吓小小豬玩得幾開心,一啲都唔似有病呀~
不過當一聽到姑娘叫名,成個樣都即刻唔同晒,好似好驚咁哦~
冇錯,小小豬係好驚。其實小小豬細個時睇醫生都唔會有事,仲好開心咁同醫生玩。不過自從睇左一個醫生(嗰位醫生其中一個診斷方法就係同姑娘按住佢嚟俾啲氣佢吸,話可以順返條氣管咁話。),之後每一次一見到醫生,又或者係戴住聽筒嘅人,佢都一定勁喊。我地估計佢可能係上次吸氣有左個負面影響,所以就一定會爆喊。
當然今次都一定唔例外,據LULU妹講,佢係醫生房門外都聽到好大聲嘅喊聲,小小豬又話醫生『曳曳』,又話『ANGRY』,當佢出到嚟仲係喊緊添~
醫生話小小豬係傷風未清,所以又係俾左啲止鼻水同化痰藥俾佢。唉...又要食藥,已經食左都有成個星期,今次又係食一星期,希望食埋今次真係會好返晒啦!
原本我都冇打算俾小小豬打流感針,怕會有副作用,同埋又聽過話流感針個成份唔係咁得。不過見小小豬好似病密左,依家真係要重新考慮吓先得啦!
唔知有冇媽咪有帶小朋友去打流感針呢?打左係唔係真係會少啲傷風感冒呢?俾啲意見我啦!
沒有留言:
發佈留言