驚喜生日鏡

26 AUGUST 2009 (WED)

終於到啦...等左成年...終於又到我生日嘅大日子，又大一歲，即係老一年啦！哈哈~

當踏正十二點時，大肥豬就急急腳走入廚房，之後就拎住個蛋糕又唱生日歌同我慶祝，真係勁開心呀！
(不過由於準備訓覺個LOOK實在太驚嚇，所以唔POST相上嚟啦！)

開心嘅時候當然唔可以停，就係依個時候，大肥豬就拎左份禮物出嚟送俾我。(其實佢之前都已經送左支28MM/F2.8嘅鏡頭俾我，所以都冇諗過會再有。)

一打開嚟睇...嘩..係支蔡司鏡頭呀(哈哈..又係鏡頭，又俾機會我去影靚相啦)~

係我地上次考慮買乜鏡頭時，都有考慮過依支，不過當時我地覺得好貴之餘，又好似個光圈唔太大，所以就唔考慮買。冇諗過大肥豬會靜靜地走去買嚟俾個咁大驚喜我。

佢話之前去試用過支鏡，覺得影出嚟好SHARP，加上又係蔡司鏡頭，好似勁啲咁，所以就買埋佢，等我地可以用嚟代替支KIT鏡影靚相。哈哈....真超級開心呀！

不過相信依支會係我地最後一鏡，因為啲鏡頭真係好貴，我都有啲肉赤.....所以唔再買啦，夠用就得啦！