尋晚我地又入左迪迪尼啦!哈哈~~~不過今次我就約埋我嘅同事,加加埋埋都有成十幾個人呀。我地大家都係主要入去玩鬼屋.....一齊去嚇鬼呀!
第一個目的地...就係大街酒店,我地排左差唔多四十分鐘,就可以入去啦!係未入去之前,我都不知幾驚,因為我其實係好怕鬼鬼,加上又聽人講過話都幾恐怖,所以係準備入去時都真係腳軟軟咁呀!
一入到去,我都唔知自己做緊乜,都唔多敢望入面啲嘢,只係捉住大肥豬不停叫。原來入面都真係幾多鬼,仲會走埋嚟嚇你,都真係幾驚。到走出門口,真係要企一陣先回到氣呀!
玩完酒店之後,大家都要抖抖先去玩另一間鬼屋,所以就趁依段時間去搵鬼影相啦!
今次就冇人物出嚟同我地影,嗰啲都係同上次一樣。不過我今次終於可以捉住南瓜人企定定影張靚相啦!
因為大肥豬話唔鐘意同依啲『朋友仔』影相,最後我都只係迫到佢同我影依一張合照呀!
影完相之後,我地就去玩機動遊戲,當然又要去太空山飛番轉先得啦~~哈哈
係太空山附近,見到有職員派糖,我地當然唔放過,走埋去拎啦,我仲拎左好多添~
我地準備返去玩森林入面間鬼屋時,行去去森林入口,剛好放煙花,我地就企係度睇左一陣。原來企係依個位睇到有另一種靚,啲煙花好似想降落你個頭上面,真係好靚呀~~
我地排左三十分鐘左右,終於入到森林鬼屋。我嘅表現都係得一個字~~驚。因為我靠牆行,有一次仲攪笑到推開左個安全門,要隻鬼走埋嚟叫我小心啲呀!
我相信我真係叫得好利害,走到出嚟大肥豬仲話我就嚟叫聾佢對耳仔呀。。。哈哈哈!
玩完鬼屋,行左一陣精品店,我地就走啦!
今個嚇鬼之旅都真係玩得開心,唯一就係大肥豬成日話夜晚影相唔靚,唔多肯影相,真係激死我呀。不過唔緊要,好快我又會入去,到時大白天就影番夠本。呵~呵~呵~
沒有留言:
發佈留言