我回來啦

哈哈~~終於都可以再上網啦！

大家見到我就即係我已經入左新屋啦！真係既辛苦...但又非常開心，終於都可以有自己嘅地方，可以過二人世界啦！

不過諗番起為左過二人世界，又真係有得有失.....

得嘅....除左係有一個幾好嘅安樂窩之外，經過今次搬屋過程，我發覺大肥豬真係好..好..好錫我。為左唔洗我咁辛苦，好多野都係佢做晒...洗廁所、窗花、拖地...好多好多野都係佢做晒，有D要爬高嘅地方又唔洗我去整，怕我有危險呀！我除左清潔個廚房同執自己D野外，好多時我都係做指揮官，睇住大肥豬做。睇住嗰時又真係覺得自己好幸福，不過又有少少唔好意思...

失嘅....當然係我地嘅錢啦！原來一個家都真係唔容易，好多野都要準備，除左D大型電器之外，仲要有好多濕碎野....煮飯要用嘅用具、酒、米、碗碟....仲有好多好多咁，真係樣樣都唔買唔得，樣樣都係錢。唉...我依家真係明白乜叫做搬屋一闊三大啦！

為有過埋新年之後就努力慳錢，學做一個精打細算嘅師奶仔啦！

聽日就要煮入伙飯俾奶奶同一班親戚食，真係好緊張呀....一次過煮十幾人飯，真係未試過，希望可以順順利利啦，唔望讚賞，只希望唔好勁彈我就得啦！

所以今晚要早D訓，抖足精神為明天而努力，所以遲少少先POST我新屋嘅相俾大家睇啦！