新形象

就嚟過新年啦！為左配合第一年以大肥豬太太身份過年，所以尋日就做左一個好重大嘅決定....就係襯髮廊未加價前，去左剪頭髮...

登..登...登.....登，依個就係小肥豬嘅新形象！

靚唔靚呀，我自己就覺得都OK，個樣細過左好多呀！哈哈哈..又係度扮細啦！

今次真係有史以來剪得最短呀！記得對上一次短髮係十幾年前，嗰次都冇今次咁短呀！其實我都諗左好耐先決定係唔係真係剪短...因為我本身係好鐘意長頭髮，成日覺得短頭髮比較男仔，唔鐘意，所以我都好耐冇試過啦！

點解我今次又會剪短.....其實我都好唔捨得，當髮型師幫我大剪時，我個心都有少少唔舒服嘅感覺呀！不過今次剪短都有兩個原因呀！

原因一：
唔知係唔係上次做負離子時D藥水唔好，所以我甩頭髮個情況都幾嚴重，成日都一梳頭時把梳都貼滿晒頭髮。加上我頭髮都傷咁，所以都考慮剪啦！

原因二：(依個都算係最重要原因)
其實同大肥豬拍拖咁多年，佢都成日叫我剪短頭髮，因為佢鐘意短髮。不過我次次都冇彩佢，佢有佢講，我有我留長，後來講到佢都冇心機再講啦！所以當我今次想剪頭髮時，就打算剪頭髮時，就等佢願意成真，俾大肥豬一個驚喜，等佢開心吓啦！

一返到屋企俾大肥豬見到我依個短髮LOOK，佢個樣真係開心都...感覺佢由心笑出嚟，仲不停係咁叫我靚女呀！見佢咁開心...都覺得今次剪短都係值得呀！

大肥豬已經叫我KEEP住依個短髮LOOK，叫我唔好留長呀！哈哈~~睇吓佢乖唔乖啦！