由籌備婚禮開始到現在，網誌都有十年了。一位全職傻媽及親子博客，喜愛利用網誌記錄我家嘅親子育兒及烹飪食譜。 讓Kinsey擁有一個快樂童年是我的目標，繼續分享我們這一家的生活傻事，見証Kinsey的成長。
經過我地睇晒D旅行社嘅資料，終於我地都決定左跟縱橫遊。因為我地今次主要都係去玩..玩...玩，依間旅行社去嘅樂園係最多，所以我地就JOIN依間啦！
竟然決定左就要去報團，所以一放工就去左報團啦！因為我地早報，仲可以減$200，雖然唔係好多，但都可以幫補吓嘛！
當個職員一幫我出單時，我真係由心笑左出嚟，唔知有冇嚇親個職員呢！哈哈~~
等我講吓我個蜜月旅程先：
第一天
香港 → 東京 ~ 橫濱麵包超人專賣店 ~ 橫濱未來21新港區：宇宙世界樂園~ 皇后購物廣場群
第二天
富士箱根國立公園 ~ 富士急動感樂園 ~ 箱根 ~ 平和公園賞櫻花 ~ 小涌園溫泉水上樂園世界
第三天
HELLO KITTY LAND ~ 淺草 ~ 彩虹橋PALETTE ~ TOWN：豐田汽車未來城、古典汽車博物館、維納斯名店坊 ~ 銀座購物大道
第四天
東京迪士尼迪士尼樂園
第五天
新宿御苑賞櫻花~ 新宿商店街 ~ 電器催賣中心 ~ 歌舞伎町 → 香港
依家真係好想快D到3月25日，可以上機啦！
東京..東京...我嚟啦！
依幾日都沉迷左去做兩件事：
第一件事就係追電視劇，依兩晚一到九點半就好乖乖咁坐係電視機前面等睇『最美麗的第七天』，真係好耐都冇試過追劇集啦！睇左兩集..真係好好睇，當然嘉穎真係又幾有型呀！
哈哈…嚟緊依十八晚我都要好乖乖咁留係屋企等睇電視呀！
第二件事就係依排愛上左打麻雀…唔好誤會，我唔係爛賭，我打嘅只係facebook有個新麻雀game。
其實我都唔係好識打麻雀，真嗰D我就唔係好鐘意玩，因為真係好大壓力咁，打得慢又怕悶親人，又怕打錯牌…平日都只係親戚朋友唔夠腳先叫我去打，不過次次都係輸錢多，打完個頭又好鬼痛，所以都唔係太鐘意打真嘅麻雀。
不過係網上玩就好玩好多，起碼唔洗咁大壓力，當係一個GAME好玩好多，我地仲約埋幾個同事一齊上網玩呀，大家聯誼吓感情嘛！所以依幾晚都日日上去玩啦！
哈哈~~有facebook嘅朋友有時間都一齊上去玩吓啦！
搬左入新屋都只係煮過一次飯俾老爺奶奶食，我地兩口子都未試過煮餐飯撐枱腳。
今日冇乜野做，所以就決定玩煮飯仔啦！
放工第一個目地又係街市...不過今日買餸先發現到一個問題，就係屋企附近依個街市買餸都幾貴呀！可能係依幾日買野貴，過左新年可能會好少少呀！
講番今日我煮嘅晚餐先，有蠔油忟雞翼、火腿炒芽菜、蕃茄炒蛋。
依次晚餐全部都係我自己諗，煮好左出嚟之後，望住整好嘅餸，真係有少少覺得自己幾叻(哈哈~~又係度自己讚自己)。
開頭都會以為會食唔晒，不過最後大肥豬都幫我清晒...見佢食晒(當然佢不停話好味啦！)，依個感覺真係幾好...好開心呀！
雖然今餐大肥豬對我嘅評分好高，都算係成功左。
不過我都要繼續努力....因為我始終覺得個味仲係差左少少，希望可以一次比一次煮得好食，同埋學煮多D唔同款式！
今日大肥豬約左幾位朋友仔嚟我地新屋企拜年，因為天氣都凍凍地，加上又可以邊食邊傾，所以都係決定打邊爐啦！
放工就即刻走左去街市買餸，買左好多餸番嚟。都買到一袋二袋咁，真係成個師奶咁呀！唉....
一返到屋企就開始好忙，又要執吓間屋仔，又要洗埋D餸，真係做到連大肥豬返嚟都冇時間理佢呀！
好在...我都可以係朋友仔上嚟之前整好晒D野。真係時間剛剛好，朋友仔一上嚟就可以食啦！
一邊整時都怕怕會唔夠食，怕客人嚟唔夠食唔係幾好。不過好在，到最後都可以全部清晒，個個朋友仔都食都飽飽咁走呀！
睇見佢地個個都食得又飽又開心，真係連我自己都好開心呀！
當大肥豬送完朋友仔走之後，一返到屋企又即刻讚我叻同乖。
由佢個笑容睇得出佢今日真係好開心，見佢咁開心...真係忙左成晚都係值得呀！
哈哈~~今日我地又入左迪迪尼啦！
唔知係唔係星期六關係，真係唔係太多人，排隊同公仔影相都唔洗等好耐。不過就因為依個原因，佢地好少公仔出嚟呀，只係新年嗰幾隻出嚟同人影相！
激死我....又搵唔到MARIE呀！
我地一入到去就見高飛，我就一支箭咁飛去排隊，依隻高飛真係好攪笑，我地影幾張相都唔同動作呀！
影完高飛，就係等睇巡遊時，又去左影依D特別佈置啦！
除左高飛之外，我地每一隻新年打扮嘅公仔都有影到呀！不過始終都係冇得同DONALD & DAISY一齊影。
行行吓見到依三個人，又冇乜人排隊，咁就又走去傻吓傻吓去影，不過始終好似唔係好夾迪迪尼依個FEEL！
我地又入左新嗰個米奇屋企睇，件件佈置都好靚，真係好得意呀！
因為大肥豬怕我病仲未完全好番晒，所以今次我地都係主要入去影相，冇玩到機動遊戲呀！所以我地都影完相就走啦！不過係臨走時，又係大門口影左幾張相啦！(真係唔放過任何機會呀！)
原本我地今次都冇打算買野，不過當我地行過精品店時見到有D衫做減價呀...所以我地就買左情侣裝啦！
今日係年初七，即係人日，人人都生日。首先祝各位生日快樂！
我就已經收到一份唔係幾好嘅生日禮物，就係依D五顏六色嘅藥丸。
唉...又要宣佈我已經被感冒軍隊攻佔左啦！真係失敗..新年又走嚟病！
其實由年三十晚開始都已經唔舒服，不過新年嗰幾日都KEEP住時好時病，加上日日又掛住玩 (有得玩就乜病都唔記得啦！)，所以都係夜晚食吓傷風藥就算！
不過由尋日開始D感冒軍隊好似越來越利害，攪到成日係咁咳，喉嚨又好痛，講野都變埋聲。原本都想過多幾日先去睇醫生，始終仲係新年，好似咁早就睇醫生唔係咁好。
不過係食LUNCH時真係覺得頂唔順，所以食埋碗粥就走去睇醫生。
醫生話我感冒同喉嚨發炎，開左D勁藥俾我食3日，就會好番哦！唔知係唔係D藥勁過頭，食完之後就勁眼訓，都幾辛苦呀！
希望可以快D好就得啦！
為左要攪間新屋，同埋第一年新年要係香港過，所以我地都未去渡蜜月，唉…見到好多同我地差唔多日子結婚嘅朋友仔都已經去完旅行番嚟，仲POST晒上網，都有少少唔開心呀！
不過.....一諗起就今年個復活節假期就超級開心，因為我地個蜜月旅行決定左會係依個假期去啦！哈哈哈~~
係新年前我地都去行過吓D旅行社，睇吓個行程，不過就好似未有心水同個價錢都未出，所以打算過左新年再去睇。
依家過左新年假期，所以又可以去睇吓D 旅行社嘅行程啦！
但之外睇過，間間都好似差唔多，同埋我地都唔係太熟識，所以就想問吓大家有乜好介紹啦！
我地暫決定去東京，不過就一定係跟團(因為我怕自由行唔識路呀！)，主要都係想去玩..玩..玩，有乜樂園好介紹呢？有乜地方係去東京必定要去呀？同埋跟邊間旅行社好呀？大家俾D意見我啦！唔該晒！
不過..仲有一關未過，就係我老細啦！唔知佢批唔批我成復活節假期都放假，真係有少少擔心，希望冇問題啦！要等佢星期一返嚟先可以問佢呀！
唔理住啦，揀定團先，都時一OK就去報名！
真係...諗起都開心呀！
原本都冇打算出街，諗住留係屋企休息吓，收拾好心情明天返工。唔知點解小豬爸好有興趣話要入大佛市集行街街，咁我地今日個節目就係入大嶼山啦！
開頭都想搭360上大佛，不過因為上去時都好多人排隊，最後我地都搭左巴士上去，打算走時先去試搭(我地都未搭過360，好似有少少OUT添)。
我地先去行吓個市集，比我地預期中少人都唔太迫。我地行店鋪睇野，不過D野就真係唔係我地買，因為比市區貴好多，所以只係睇完就算啦！
係市集中途有棵心型樹葉樹，我究竟好耐先知係假，仲俾大肥豬笑我呀！
之後行完市集就行去大佛啦！係途中見到有熱辣辣粟米賣，為食嘅小肥豬當然又係咁食...食...食，不過又真係好甜好好味呀！
行左寶蓮寺一陣，之後我地就走啦！
係回程時我地個個係咁你推我讓話去搭360(其實個個都仲擔心有危險，唔係好想搭！)，最後都係維持搭巴士走。
係臨走之前去覽車附近影張相，証明嚟過就算啦！
哈哈哈~~真係又冇得搭360，不過都係遲D先再考慮去搭啦！始終都仲有少少驚驚地呀！
每年年初三小豬爸都有一個習慣，就係一家人揸車入新界行吓，行個大運呀！今年當然唔例外，我地一行七人去新界行個大運啦！
第一站我地就去左林村探吓許願樹，可能冇得拋寶碟，所以唔係太多人。我地行左一陣D鋪頭仔，食吓D懷舊小食就走啦！
之後我地就去左士多啤梨園，原本我地都冇打算去摘，諗住八卦吓就算，不過我地又見到其他人摘到好多又紅又大粒嘅士多啤梨，我地當然摘埋一份啦！個場又冇乜人，我地鐘意點摘都得。
嘩~~真係有好多士多啤梨，我地一邊摘一邊玩，好似尋寶咁，見到又紅又大粒就衝去摘，真係好好玩呀！
依盤就係合我地七人摘出嚟嘅成果，唔好睇少佢呀，都有成三磅幾呀！依家留番星期一小豬媽佢地上嚟我屋企食。不過偷食過....真係好甜呀！
玩完一輪，就陪小豬媽入去附近嘅雲泉仙觀行左一陣啦！
之後我地就去流浮山進發，因為小豬爸話請我地食海鮮呀！好野...萬歲！
入到流浮山見時間仲早，所以就行左一陣，跟進我地就一齊去買海鮮，準備食餐飽啦！
我地真係冇野玩，係小豬媽揀海鮮時，我地就拎左D海鮮嚟玩，哈哈..真係八厭啦！
今晚個晚餐真係好豐富，都幾好味呀！食都個個都好飽飽咁走呀！
首先就係依個豉油蝦，好味指數真係好高呀！
椒鹽瀨尿蝦，我嘅至愛....
西式辣酒煮蜆，賣海鮮位姐姐介紹咁煮，整出嚟又幾好味！
一人一隻鮑魚仔，我地仲用刀叉食，個感覺幾好feel呀！
清蒸紅瓜子魚，『紅瓜子』係條魚名嚟，都係第一次聽呀！
仲有粉絲象蛂蚌，依個比起其他就麻麻地啦！
最後當然要食碟菜同抄飯啦！
食飽飽就走人，埋單都唔係太貴，都幾抵食。不過唯一美中不足就係加一問題，sell我地嗰位姐姐話冇加一，但最後竟然有收，真係.....原本我地都想理論吓，不過小豬爸話新年就算。
今日就係咁過左啦！真係都又好玩又好食嘅一日，不過肯定又係勁肥嘅一日，因為為食嘅我真係冇停過口呀！
哈哈~~終於都到左年初一啦！雖然係放假，但都同平時一樣要早起身，因為行程真係好忙....
首先就係要一早要去同祖母飲茶，依個又係一個指定動作，唔可以遲到嘛！
係飲茶中途，就要做今年第一次做嘅野...就係派利是啦。派嗰時又真係幾開心，不過個感覺有少少怪，好難形容，可能始終係第一年派啦！今年一路都以為冇利是收，點知姑姐同叔叔都有俾我地，真係超開心，可以幫補吓嘛！哈..哈...哈....
飲完茶，我地就同小豬媽一行八人去左太古城等睇戲。係等睇戲時見到有新年佈置，我地咁鐘意影相當然唔會放過啦！
新年新LOOK新手袋呀....
我地今次就係睇『長江七號』，講真我都係對依輯麻麻地，不過小豬爸同大肥豬都係周星星FANS，所以冇法啦！睇完套戲...真係覺得冇之前星爺嘅戲咁好笑，同埋成套戲都係徐嬌做晒，我自己覺得就真係唔係太好睇呀！
睇完戲就要同佢地分手啦，因為要返去同奶奶拜年食飯呀！
今年真係勁多人，差唔多返整人，大大話話都有成廿幾人，真係好熱鬧呀！
食完飯之後，就玩左一陣啤牌。唉....都係冇乜運，發唔到新年財，仲輸左百幾蚊呀！不過唔緊要，只在乎個過程開心，大家自己人又有乜所謂呀！
今年第一年係新屋過年，原本都唔打算點佈置，都只係打算買一個揮春貼係門口。但小豬媽就話唔好，第一年新屋都應該買少少野擺吓，所以開頭都只係買多個傳盒就算。
不過前日同小豬媽行過D花店，見到好多好靚嘅年花，咁就有少少想擺番盆係屋企啦！不過有咁多款都唔知買乜好。
當我仲考慮緊嘅時候，小豬媽就話：買水仙啦！旺夫呀！
嘩~~旺夫哦，當然唔再考慮決定買水仙啦！
不過因為嗰日我地趕時間，所以冇得慢慢揀，打算遲D先再去揀。
點知今日返小豬媽屋企食飯時，佢已經幫我準備左一盆好靚嘅水仙花，仲幫我整佈置好晒呀！
我一番到屋企就即刻擺好，雖然未出花，不過真係越睇越靚，希望可以趕得到年初一開花啦！
係新屋第一次煮飯，話晒都算係入伙飯，仲要第一次煮飯俾老爺奶奶同大肥豬嘅親人食。加上之前都有一段時間為左攪結婚野，都有一段時間冇跟小豬媽學煮野，真係攪到好緊張呀！
為左依餐飯，我都既緊張又擔心，好驚整出嚟唔合佢地口味，又怕整出嚟好難食...又要諗煮乜好，真係好多問題呀！雖然之前都有煮過飯，不過都妥心總係好驚呀！
好在我有一個好強勁嘅後援 ~~ 就係小豬媽啦！佢幫我諗好晒煮乜餸，又教我買乜材料，又教點煮，真係令我放心左好多呀！
原本有成十幾個人嚟食飯，不過後來因為其他人有事唔嚟得，所以最後都得番老爺奶奶同一位阿哥嚟食飯。雖然係人少左，不過唔知點解仲驚，可能始終係整俾老爺奶奶食，唔多唔少都有D壓力啦！
其實有部分材料我係尋日都已經買左，所以今朝一早起身就開始為個晚餐做準備。
首先就係煲個靚湯，我依個湯係一個青紅蘿蔔煲豬骨，都OK易整，洗晒D材料放入個煲度就得啦！不過我就成日好驚佢滾到倒出個爐頭，所以我成日要入去廚房睇住個火呀！之後就整D餸，洗、切....唔經唔覺都攪左成個下午呀！
等到老爺奶奶嚟到，招呼左一陣就又要入廚房開始煮我個晚餐啦！
得自己一個人係廚房個感覺都幾驚呀！好驚煮唔成餐飯...好驚煮唔熟...好驚彈油....總之乜都驚啦，又冇人可以幫到我，總之就一邊煮就一邊驚，依個時候就特別掛住小豬媽呀！
係整整時，大肥豬係半偷影狀態影左張相，睇番真係好師奶呀...救命呀！
經過一輪驚慌又要扮冇乜野嘅煮飯之後，終於都完成左三餸一湯白飯任莊嘅晚餐啦！
香蔥炒雞
上湯浸娃娃菜
其餘仲有蒸桂花魚同個湯，由於時間同驚慌關係，唔記得左影相留念呀！
好在大家對我依一餐都好滿意，仲食得晒D餸呀！我老爺仲讚左我好多次，真係聽到都好開心！
大肥豬就唔洗講，由我煮完飯到洗完晒D野，佢個口都未試過唔笑，仲不停係度讚我乖..叻呀！哈哈..嗰吓我真係飄飄吓呀！
雖然煮飯同善後工作都幾辛苦，俾人讚賞都覺得值得呀！
不過都要真係多謝小豬媽，冇佢我都唔可以煮得咁有水準呀！
