【好味又抵食】新竹源越南餐廳

11 JANUARY 2018(THU)

早幾日同好姊妹出灣仔行街街買嘢，難得可以放假一晚，又點會咁快返去交人，緊係食埋個晚餐鬆下先啦！

我地行過一間新開張嘅越南餐廳，突然個腦海浮現左啲牛油雞翼，所以就二話不說入去食啦~

其實依間越南餐廳都係試業當中，我地都唔知好唔好食，不過就見佢都幾乾淨，啲坐位又唔會迫迫夾夾咁，所以就入去試下啦~

其實....另一原因係我實在行得太耐，有點攰最想舒舒服服有得坐呀...哈哈哈~

坦白講，我自己都比較少得越南嘢，所以點餐嘅任務就交俾好姊妹啦~

第一時間就要叫杯飲品先，好姊妹嘅龍鳳冰，佢話個味都唔錯，入面啲龍眼肉好有咬口。我就嚟一杯椰汁三色冰，個椰汁味都幾出，而且又唔會太甜~

先嚟一個鮮蝦沙律，佢嘅蝦都算好大隻而且仲好彈牙，加埋個酸酸甜甜嘅汁一齊食，真係好開胃，依個小食我大力推介呀~

之後就輪到腦海中的牛油雞翼，唔知係咪我地因為相機食先關係，所以佢個雞翼皮就好似冇咁脆口，但入口嘅味道都算唔錯~

再嚟一個我軟殼蟹米紙卷，佢個軟殼蟹都炸得好出味，配埋入面啲蔬菜一齊食，個口感都唔錯，不過如果個米紙可以薄身少少，咁應該會更加好味呀~

再嚟一個香燒豬頸肉，佢個豬頸肉又整得幾好食，夠入味得嚟又唔會太咸，而且厚薄又差唔多，所以唔覺唔覺我都食左大半碟~

店員仲教左我地一個新食法，就係加埋少少蔥花一齊食，估唔到個味道又幾得意哦~

嚟得食越南菜，又點少得整返一個越式生牛肉河粉。因為我唔食牛關係，所以就冇得食，不過好姊妹就讚口不絕，佢話啲牛肉入口好嫩，同埋啖湯先係亮點，湯底超甜但飲完又一啲都唔會覺得口渴，佢話整體上係超正哦~

今餐又真係唔錯，整體上食物都唔錯，而且最好就係環境都幾好，我地唔覺唔覺邊食邊傾，咁又差唔多兩個鐘了，所以話呢....開心嘅時間係過得特別快呀！