【健脾養胃】紅米水

7 JANUARY 2018(SUN)

因為病而縮左成個碼嘅小小豬，佢有返體力同精神之後，就當然到我工作嘅時候，努力諗下有咩方法可以跟返消失的磅數。

正當我好努力上網搵資料時，就搵到一篇女中醫嘅訪問，仲教我地煲一個超級簡單但又可以健脾養胃嘅紅米水，咁簡單我就當然即刻買齊材料煲俾小小豬飲啦~

原來一杯簡單嘅紅米水係可以健脾養胃，舒緩無胃口、胃脹等症狀。另外脾胃狀態好就自然能強身防病，因係脾胃虛弱，食咩滋補食材都係唔吸收，所以健好脾胃就可以基本之方法啦！

紅米2湯匙、白米半湯匙、生薏米半湯匙~

將所有材料浸洗一陣~

煲內放約1L水，然後加入所有材料~

先用大火煲滾~

然後轉用慢火加蓋煲多25分鐘~

話咁快就飲得啦~

入口都冇乜味，淡淡地就好似飲緊有少少味道嘅水咁，所以大人同小朋友都應該唔會抗拒。 依個紅米水係可以每日飲，但就一定要一天飲完，唔可以隔夜。

不過，依個份量煲起就有一杯多少少，所以一日飲一杯都唔難(係睇下我有冇恆心日日煲...哈哈哈)。不過為左小小豬，依排就勤力啲啦！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！