【地鐵控必到之地】港鐵展廊

27 MAY 2017(SAT)

小小豬係一名不折不扣嘅地鐵控，佢真係可以背得晒各路線嘅站名，有時都真係令我有啲驚！ 

話雖如此，小小豬由二月初開始，每日放學路經有關港鐵展廊嘅宣傳海報，日日如是佢終於忍唔住要求我帶佢地參觀，幾經辛苦終於book到，今日可以嚟參觀啦~

其實生仔唔知仔心肝，小小豬未同我講時我都一早知道有依個展覽，所以都想靜雞雞book左，之後俾小小豬一個驚喜。不過網上預約一直爆滿，每星期都好準時咁上網搶位般，好在終於我都係大半個月前預約到，book到嗰一刻真係超激動呀！ 

展廊嘅入口就係一幅由幾千張港鐵發售過嘅儲值車票而組成，地鐵控一見到就已經何其興奮啦~ 

 

其實唔止小小豬，我一見儲值車票都有少少童年回憶湧出嚟，因為有好多張我細細個時都有儲(大件事....又爆左自己那些年添)~

 

入左展廊之後，首先就會睇到一列港鐵列車模型，每個模型旁都有詳細寫上列車嘅出產地及開始行走年份。另外，除左我地平日搭開嘅列車同迪士尼列車之外，原來都係仲有機場快線、輕鐵列車、九港通及輕鐵等。好在有導賞姐姐介紹，小小豬又知多啲啦~

 

除左列車模型，場內仲播放港鐵發展歷史影片，地鐵控就緊係最鐘意，因為可以睇到各車站幾時開始運作嘛~

 

睇完短片就可以去玩港鐵小遊戲，睇下對港鐵有幾認識，當然小小豬係全部答啱對啦~

 

仲有得玩影相添，不過就要職員姐姐幫手控制啦~

 

之後我地就入去1:1港鐵模擬車廂，感受兩代車廂內嘅環境~

 

係入車廂之前，記得留意睇埋牆上歷年港鐵宣傳海報呀~

 

模擬車廂就分為兩部分，首先就係1978-1998嘅車廂，我真係有點懷念那波波型嘅扶手呀~

 

想當年嘅鐵路線圖都可以睇到呢~

 

另一個模擬車廂就係1998年至今嘅車廂，我想大家都唔會陌生啦~

 

除左參觀，仲可以玩VR GAME，小小豬話係摸擬搭緊南港島線，平日唔多玩VR嘅佢，就係因為港鐵關係玩左四次添~

 

玩完VR GAME，仲可以扮車長渣港鐵，不過可能都只係以滑鼠控制，所以小小豬投入感不大，玩左一次就唔再玩啦~

 

唔覺唔覺一小時參觀時間話咁快就完，唔係姐姐話要準備下一節活動，小小豬都唔肯走(姐姐都提左佢四次先肯乖乖離開)。

原來走嘅路程都有好多港鐵模型圖片展出，有啲仲係手稿嚟呀。不過因為我地真係要走，所以就只可以快影快睇啦~

 

對於地鐵控一個鐘嘅參觀時間又點夠，好在展廊外圍都有啲與列車有關嘅展出，咁又可以俾小小豬睇多一陣~

 

最後千其唔好忘記係依個3D位同機鐵影返張相呀~

 

有興趣嘅朋友仔可以去港鐵網站登記啦(不過....真係要計準時間去BOOK呀)~

 

當我未嚟參觀時我都好擔心一小時係咪可以玩晒，始終港鐵地咁耐歷史，都應該幾多嘢睇，但以我個人嚟講，我又真係覺得好似展覽都唔算豐富，同埋地方又好似細左啲啲。如果可以展出埋歷年所推出嘅發售精品，或者可以多展出唔同列車嘅1:1模擬車廂，咁就應該仲正(我認我係有點貪心...哈哈哈)。

不過以地鐵控嚟講，依度可以完全滿足到佢地，有得玩又有得睇，小小豬係依一小時參觀都不知幾投入，走嘅時候仲叫我快啲再上網登記，再帶佢嚟睇多一次呀！