病好左之後,總係覺得啲痰好似困住困住咁,攪到周身唔舒服。係煮食群組見有朋友仔介紹依個去痰止咳嘅龍脷葉桔餅茶,除左龍脷葉之外其他材料屋企又有齊,所以就趁去街市買餸時買埋新鮮龍脷葉,快快手煲下啦~
唔好睇少細細塊嘅龍脷葉,原來佢嘅功效好利害,可以止痰化咳、嗽哮喘、肺熱咳嗽、急性支氣管炎、上呼吸道炎及支氣管哮喘之用,煲多啲嚟飲,同身體打打底先。加埋桔餅就可以止咳同化痰,減少喉嚨痕痕嘅情況,好似幾啱我哦!
桔餅切碎;南北杏及蜜棗洗淨;果皮浸軟刮囊~
龍脷葉洗淨~
煲內放約1.5L水,然後隨水加入陳皮~
待水滾後加入所有材料~
繼續用大火加蓋煲約15分鐘~
之後轉慢火加蓋煲45分鐘~
隔楂後就可以飲啦~
煲龍脷葉涼茶我一向都唔擔心,因為我家兩位老細都好鐘意飲。雖然今次都只係簡單材料,不過可能有桔餅關係,所以入口甜甜地呀!
我依個份量煲好左之後大約有750ml(因為剛剛好一放滿一支支裝水),除左同小小豬分享左一杯之外,我就全日當水飲,痰頂頂情況就好似有點點改善呢!
溫馨提示:
由於個別人士體質不同,所以大家記得煲之前了解下自己,如有疑問,請先向註冊中醫查詢!
沒有留言:
發佈留言