【清熱降火】糖冬瓜粟米鬚薏米水

13 MAY 2017(SAT)

講起小小豬最鐘意嘅涼茶，就一定係粟米鬚水，一有粟米水佢就會不其然地狂飲。既然小小豬鐘意我就當然非常願意煲，不過就唔係成日買到，因為街市姐姐話一返貨就會晨早賣晒。今日竟然俾我又見到，所以就買少少加埋糖冬瓜同埋薏米嚟煲個糖冬瓜粟米鬚薏米水啦~

 

其實依個我都真係成日煲，就係因為我成日都煲，我就以為同大家分享過，睇返....原來我係冇哦，所以就等我借今次機會同大家分享，因為依個涼茶真係好好味，而且係非常簡單，我想好多大小朋友都一定鐘意呀！

粟米鬚薏米水可以清熱降火，利尿消腫同埋清熱毒，加埋糖冬瓜就可以有滋潤同埋清熱生津止渴之效，而且味道又會甜甜地添！ 

粟米鬚一斤、生薏米1両(約半飯碗)、熟薏米1両(約半飯碗)及糖冬瓜適量~ 

 

首先就將啲粟米鬚洗乾淨~ 

 

生熟薏米都浸洗一陣啦~

 

煲內放入3L水，煲滾後就可以加入生熟薏米~  

 

然後就用大火加蓋煲約10分鐘~ 

 

依個時候就可以加入粟米鬚~

 

繼續就用大火加蓋煲約15分鐘~

 

然後就可以因應個人口味加入糖冬瓜，我大約加半包左右啦~

 

加蓋慢火煲45分鐘~

 

隔清晒啲渣之後，就可以飲得啦~

 

小小豬真係勁鐘意飲，每次都係會快快手同我清晒成杯，仲一定要添飲。其實係唔係有效清熱氣或者對濕疹好我就唔太敢講，不過利尿就一定好有成效，因為每次飲完粟米水之後，小小豬去VV次數係密左又多左。去得VV多，咁就可以排下身體毒素，唔多唔少都應該有啲幫助呀！ 

溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！