【提高免疫力】青紅蘿蔔猴頭菇豬骨湯

7 DECEMBER 2016(WED)

前日係網上見有朋友仔將家常嘅青紅蘿蔔豬骨湯加埋猴頭菇一齊煲，話好味之餘又可以提高免疫力，剛好屋企又買左一包猴頭菇，加上兩位老細青紅蘿蔔湯有一種情義結，所以就買齊材料又試下，睇下係咪咁好飲先~
 
當然係煲湯之前，我都有上網睇過下猴頭菇嘅資料，平日聽就聽得多，原來猴頭菇係好有益。猴頭菇含不飽和脂肪酸，能降低血膽固醇和甘油三酯含量，調節血脂，利於血液循環，是心血管患者的理想食品；而且具有提高肌體免疫力功能；最重要係猴頭菇是一種高蛋白、低脂肪、富含礦物質和維生素，係一種優良食品嚟呀！ 

紅蘿蔔2條、青蘿蔔1條、豬骨約$40、南北杏1湯匙、蜜棗4粒、猴頭菇2粒及陳皮1片~

 

南北杏及蜜棗洗淨；陳皮浸軟刮去皮瓤；猴頭菇用水浸軟(最少30分鐘)~

 

青紅蘿蔔洗淨去皮切件；豬骨洗淨汆水~ 

 

猴頭菇浸軟身之後，擠乾水份，然後切開幾~

 

煲內放約3L水，然後隨水加入陳皮~ 

 

待滾起後，加入所有材料~ 

 

繼續用大火加蓋煲約15分鐘~ 

 

之後轉慢火加蓋煲多1.5小時~ 

 

最後加鹽調味，就可以飲得啦~ 

 
加左猴頭菇嘅青紅蘿蔔豬骨湯其實個味道又冇太大分別，所以兩位老細都依舊係非常鐘意飲，轉眼間又幫我清晒，所以話呢.......我嘅動力都係來自佢地呀！ 

既然味道不變，猴頭菇又係咁有益嘅食材，所以下次再煲青紅蘿蔔豬骨湯時(其實依個湯我都煲得幾密呀...哈哈哈)，都加埋一齊煲，等兩位老細都可以提高免疫力，都可以病少啲啦！

**我地的FACEBOOK PAGE，齊齊來交流親子。育兒。烹飪啦**