為左要為小小豬準備愛心便當,所以我又開始物色一啲啱帶飯又令佢食得開心嘅菜式,第一個諗到嘅就係依一個粟米肉碎西蘭花啦~
其實整俾小朋友食最重要就係健康,同埋要佢自己鐘意食嘅,有齊依兩項條件,咁就唔怕佢地唔願食。
今次依個有小小豬鐘意嘅粟米,又有齊肉類同蔬菜類,咁就夠啱健康啦!
先將西蘭花切塊,放進沸水稍灼約3分鐘;蒜頭去衣拍鬆;免治豬肉用少少糖及鹽醃最少15分鐘~
先下油熱鑊,然後加入蒜頭爆香~
待豬肉炒至差唔多熟時,就可以加入粟米蓉~
快手將兩者炒勻~
最後放入西蘭花再炒勻,加入少少糖及鹽調味~
食得啦~
依個餸小小豬都不知幾鐘意食,用啲粟米肉碎嚟餸飯,真係食得特別快。雖然我係為左整愛心便當先準備依個餸,不過依個份量就係我地三口子晚餐嘅用量,因為小小豬鐘意食,間中煮多幾次又有咩所謂呢!
沒有留言:
發佈留言