【熊仔陪歎Tea】超可愛 皇家奇想曲下午茶

13 DECEMBER 2016(TUE)

朋友係要去見嘅，所以當朋友問我有冇興趣一齊去歎可愛嘅熊仔下午茶，貪玩嘅我就當然即刻二話不說答應啦。既可以充充電，又可以食個可愛下午茶，都幾好玩哦，所以今日趁小小豬返左學之後，就去DK Cuppa Tea歎佢地最新嘅「皇家奇想曲」下午茶啦~

 

其實DK Cuppa Tea嘅下午茶我都成日聽朋友介紹，每一次嘅主題都係好吸引，有木馬、貓仔、鴨仔....好多都好特別。今次就英倫熊仔為主角，總之就係熊...全部都係熊啦！

先嚟一杯暖烘烘嘅薰衣草朱古力茶，淡淡嘅朱古力味有帶點薰衣草真係好特別，我自己都飲咗好多杯呀~

 

等咗一陣，我地嘅下午茶已經準備好，真係超靚呀，如果小小豬在場一定尖叫不停，因為佢就係最鐘意啲毛毛熊公仔~ 

 

我個人就最鐘意那朱古力皇冠下嘅黑松露芝士蛋糕，將黑松露混合係芝士蛋糕之中，估唔到個味係咁夾，真係超級好食，香而不膩仲一啲都唔覺得甜，絕對係我嘅大力推介呀！當然旁邊嘅小熊守衛牌唔可以錯過，以黑朱古力精細地刻畫，造得都好仔細，真係有啲唔捨得食。唔食唔食...都係要食(唔好浪費嘛)，一向黑朱古力都俾我有一陣苦澀味，不過依個又真係一啲都唔覺，令我對黑朱古力改觀了~

 

印有英國旗圖案嘅榛子馬卡龍，唔甜得嚟個榛子味好出，真係好想食完一粒再一粒呀~ 

 

玫瑰朱古力心太軟蛋糕，暖暖嘅甜點充滿濃郁朱古力同埋玫瑰嘅香味~

 

除左甜點之外，SET內亦配有鹹點，同樣都好有驚喜。法國鵝肝配上小餅乾、芝士拼盤、提子鬆餅同埋莎樂美香腸薄片。不過論最吸引我嘅，就一定係英式芝士肉醬肉丸，估唔到一個簡單嘅肉丸，可以變出咁有特式，同平日食嗰啲真係好食好多呀~ 

 

食飽飽之後，店員就會同我地玩個小遊戲，係五張「魔法咭」內隨心抽一張，之後就會為我地介紹屬於我嘅香薰精油及其療效~ 

 

原來我係啱用香柏木，佢嘅代語就係耐性、力量同可靠性，又好似幾準哦，我依排嘅力量又真係好弱，充滿負能量，睇嚟又真係要搵啲可靠性朋友幫幫我呀~ 

 

最後，下午茶還附送皇室小熊明信片，將願望寫上之後，就可以放到店門外的皇家郵寄筒寄出，睇下自己嘅願望會唔會成真啦~ 

 

食左一個又靚又好味嘅下午茶，又同朋友暢談一番，真係充滿力量，又可以返去服待兩位老細了。

依個SET供應到二月尾，就到時間一定要帶小小豬嚟，有咁多熊BEAR BEAR陪佢食嘢，佢一定勁興奮呀！

**我地的FACEBOOK PAGE，齊齊來交流親子。育兒。烹飪啦**