小小豬牌愛心PANCAKE

10 APRIL 2016(SUN)

小小豬依排好似小廚師上身咁，既尋日整左整蛋黃哥啫喱橡皮糖，今日又要我幫佢去買材料，話要整PANCAKE哦~

其實小小豬的起條根話想整PANCAKE係有原因嘅，咪就係睇到佢嘅頭號偶像整，佢咪又要跟埋整~ 
 
哈哈哈...雖然小小豬都真係幾花心，見一個卡通公仔就鐘意一個，不過最得佢歡心嘅就一定係PEPPA PIG一家(可能大家都係同類啦...呵呵呵)。由於今日佢乖仔，所以就俾DADDY獎勵有得睇電視半個鐘，佢就緊係揀佢至愛嘅PEPPA嚟睇啦！

睇見PEPPA整PANCAKE，佢又話好想整埋一份。原本我都唔太想同小小豬整，雖然我地都成日入廚房，不過都只限係煲嘢，佢又完全未煎過嘢，實攪到"論論盡盡"，我實有排執手尾。

但見佢咁有誠意，同埋都要俾啲信心佢，所以就去即刻同佢去買預拌粉，同佢齊齊煎個PANCAKE啦！

一向我都唔太叻整PANCAKE，所以都係簡簡單單係759買包預拌粉，再加牛奶同雞蛋咁整~

 

先將其中一份預拌粉倒入大碗內~ 

 

再加入一隻雞蛋~ 

 

同埋150ML牛奶~ 

 

慢慢攪至麵糊混合至沒有粒粒，然後就可以拎去煎啦~ 

 

先用平底鑊燒熱，再加少許牛油~ 

 

之後就可以將粉漿下熱鑊中~ 

 

煎第一面見時見表面有少少孔，就可以反轉煎另一面。當然依個步驟我都出左少少手，如果唔幫佢反轉，我諗一定不似餅型呀。

不過一反轉之後，小小豬就要拎返個工具話要自己繼續煮~ 

 

話咁快就煎好晒，以小小都豬嘅手勢，都叫唔錯啦~

 

自己有份整又真係食得特別滋味，仲叫邊食邊話好味，叫我下次再俾佢自己要煎過，仲話唔洗我幫手，真係激C我呀~

 
見隻傻豬仔食得咁開心，同埋見佢面上展示嗰一種成功感，都感染埋我都開心埋一份，所以我都係要再放多少少手，唔好幫佢決定得太多，俾多啲信任佢，等小小豬鐘意整咩嘢食就由佢話事，因為分分鐘就係充滿驚喜，今次依個PANCAKE咪就係一個好例子啦！

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦