白石角海濱長廊

6 DECEMBER 2015(SUN) 
話說上星期我地去科學園參加活動之後，由於已經入夜所以小小豬就少左玩車時間。見今日天氣都幾好，所以就入去玩一轉，等佢飛下車啦~

 

正確嚟講我地今日都唔算係入科學園玩，而係沿白石角海濱長廊行一轉。其實上幾次嚟科學園都有行依條海濱長廊，不過次次都係行一小段路就走，今次終行左差唔行晒啦~

 
可能天氣都算唔錯，所以我地行下又吹下風，整個感覺都真係唔錯，好舒服呢！

當然小小豬就一直踩住佢部滑板車，不停向前片呀...片呀，我都冇佢咁好氣。佢地兩父子就片車，我就慢慢沿走廊行下，欣賞下周圍環境都唔錯呀~

 

有得踩住部車不停向前衝咁大放電，依隻豬仔緊係異常地興奮啦~  

行到一半，原來係有一間小食亭，佢嘅價錢都算大眾化，所以我地都坐低休息一下，充充電先啦(係指我呀...哈哈哈)~

 

再行前多少少，就有個幾靚又乾淨嘅碼頭。地方大之餘又有好多公眾座位，咁小朋友就可以係度玩下車，大人又可以休息一下，都幾好哦~

 

當然.....如果可以係度睇下啲叔叔釣魚，或者嚟吹下海風，都真係人生一大樂事。睇佢兩父子幾好FEEL....哈哈哈~

 

行到一半依隻古惑豬又嚟攪攪陣，又話比賽跑步哦。平時唔多肯比賽嘅小小豬竟然主動提意，我地當然係願意作出配合，不過跑嗰個就一定唔係我啦~

 

仲係度扮行平行木添~

 

其實沿海濱長廊旁邊都有一條單車徑，上幾次嚟小小豬都有踩住佢部小單車行一段路。亦都係因為佢試過關係，佢今次又話想沿單車徑行一轉。

我都知道利用滑板車行單車徑係唔啱，不過嗰個時間又冇乜車，所以就快快手行一轉啦，我都已同小小豬講下次帶單車嚟先可以咁做呀~

 

估唔到依個簡簡單單嘅海濱長廊都夠我地三口子玩一整個下午，行下又坐下咁，舒舒服服....真係人都輕鬆好多呀！

經過今次，我家兩位老細都更加愛科學園同埋依個海濱長廊，佢地仲已經計劃聖誕假搵日再入嚟玩車。不過其實我都幾鐘意，所以再嚟我都冇問題，只要大老細(即小小豬)乖乖的話，佢話去邊就去邊啦，所以.......相信好快我又會再嚟啦！

**我地嘅FACEBOOK FAGE，唔知大家LIKE左未呢？**小小豬的成長日誌
大家一齊嚟交流下煮飯仔及去玩嘅親子樂啦！