聖誕表演又嚟啦

18 DECEMBER 2015(FRI)

每年聖誕節，其實我都有一刻嘅期待，因為小小豬又可以參加聖誕表演活動，又有得上台跳舞啦~

其實....小小豬有咩材能我又點會唔知呀？佢一向體能都係比較差，再加上依隻傻豬仔都唔善於跳舞，所以都諗到佢係唔會有咩主角位可言，企亦都一定係企後排。

不過在於我立場，小小豬可以係台上順利地完成佢嘅部份，我都已經係話可以收貨了。

由十二月初開始，小小豬每晚臨瞓前佢都會主動跳佢嘅舞步俾我地睇，每次都跳差唔多半個鐘先肯休息，真係三年來佢主動兼恆心嘅一年。

話晒都係最後一年係幼稚園表演，加上見到佢又好似好努力咁，又點唔可以帶點期望呢！

終於嚟到表演日，好在我地早左去搵位，都叫做霸到個前排位，坐定定等睇小小豬表演啦~

YEAH....終於等到小小豬嗰班跳舞，其實佢地係表演牛仔舞嘅，不過服飾又好似有啲.....，但成班同學仔一齊著都幾好睇呀~

一開始表演我就金睛火眼咁等小小豬出場，終於係第三部分到佢出場啦~

一如我當初我所想，佢都係人仔細細企後排，所以間中都俾人遮住左，不過佢都叫做跳晒佢負責部分, 跳嘅時候又冇乜發傻，仲間中笑笑口，所以都算佢啦！

今次真係勁黑仔，原本係打算拎部長鏡單反去打豬，點知.....部相機開唔到，疑似係粒電壞左，所以只好用傻瓜機嚟影呀....真係十個唉呀！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！