HEA遊觀塘海濱公園

28 SEPTEMBER 2015(MON)

作為九龍東嘅朋友，我地最鐘意嘅地方就一定係觀塘海濱公園，真係可以話小小豬細細個未識行就已經成日嚟玩啦~

其實點解我地鐘意嚟玩？當然除左近我地之外，整體上個環境又真係好舒服，有個海濱長廊對住個超級無敵大海景，又有一個大草地，坐係度吹下風又點會唔寫意呀！亦都係因為依個原因，我地三口子嚟嘅次數係咁密。

係暑假時因為天氣勁熱同又多節目去玩，所以都有一段時間冇嚟過。隔左一排再嚟，原來都已經有好多唔同，個海濱長廊長左，又多左好多草地，最重要係多左一個比較大型嘅兒童玩樂地方。依度係正天橋下面，所以都唔會怕曬親，小朋友可以大玩特玩啦！

有得跳飛機啦~

又有一個英文字嘅路線圖~

仲有一個升級版轉轉轉~

同埋搖搖板添~

其實仲有一個練手力嘅小遊戲，不過原來小小豬已經大個仔，玩唔到啦~

玩完公園仔一陣，我地就轉戰向草地，因為小小豬帶左少少生果嚟話要野餐呀~

唔知點解依隻豬仔一去到草地就除左對鞋，之後仲係個草地上跑來跑去，話要唱歌跳舞俾我地睇哦~

哈哈哈.....當然唔少得吹下泡泡啦~

可能個環境實在太舒服，所以最後依隻傻豬仔就瞓左係草地上左碌碌又爬係度咁，好似好享受咁哦~

唔覺唔覺原來我地都係度玩左兩個幾鐘，悠悠閒閒又過左一個下午，雖然我地又真係成日嚟，但而好似唔多覺得厭。學老公話：預期要花心思左諗右諗去邊度玩....邊度放電，點解唔去多啲自己認為舒服鐘意嘅地方呢？

咁.....其實我又真係幾鐘意坐係草地望住個海，好似成個人會好RELAX，有咩煩惱時都停一停，所以成日嚟我都唔介意，最緊要就係大家都玩得開心嘛！(當然....我內心深處都想多啲去唔同地方玩，同小小豬一齊玩多啲唔同嘅活動啦.....哈哈哈)