養心安神湯

22 OCTOBER 2015(THU)

依排煲嘅湯主要都係俾湯怪小小豬飲，所以都佢煲啲比較清甜嘅。不過今次就煲一個比教藥材性重少少嘅養心安神湯，等我自己可以養心安神一下~

 

冇錯....近排我嘅睡眠質素都比較差，明明都已經好眼瞓，但落床又瞓唔著，好似好多嘢諗，上至屋企大大少少...下至小小豬....總之係咩都諗一餐。

上網睇到有朋友仔教煲依個湯，話可以養心安神，治失眠，心火燥同埋清熱氣。見簡單得嚟又唔難煲，所以就買齊材料試一試。

材料就有雲苓、白芍、熟棗仁、茯神、玉竹、麥冬、蜜棗及豬肉$40。上面嘅藥材只要去藥材店，同店員講有幾多人飲，佢就會執所需份量~

藥材先用水浸洗一陣，豬肉洗淨汆水~

煲內放約1L水，將其他材料放入煲內~

水滾後轉用慢火煲約一個半小時~

最後加鹽調味就飲得啦~

我依個分量大約可以煲出六碗湯，原本都係預我地三口子每人兩碗(我地平日嘅分量)，不過，可能佢嗰一陣藥材味都比較濃，所以湯怪小小豬都有點......，所以佢都只係勉為其難咁飲左一碗。

哈哈哈...其實我一早都估到隻豬仔係唔鐘意依個味，但就估唔到佢會主動同我講：『MaMi....依個真係唔好飲，下次煲過另一隻味，不如煲雪耳呀，會變靚仔呀』，真係俾佢C。

雖然小小豬就麻麻地鐘意，不過其實個味又真係唔係咁錯，飲落甘甘地都唔錯呀，我一個人都飲左三大碗呀！

坦白講，依個都唔係神湯，唔會一飲就即刻好好瞓，所以我都買多一份材料，過幾日再煲。不過，就算失眠唔WORK，煲嚟清下熱氣都唔錯呀！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！