姊妹們的浪漫@Castello 4

19 OCTOBER 2015(MON)

早幾日姊妹們問我有冇興趣去浪漫下，哈哈哈...有得玩我當然有興趣，所以就出左銅鑼灣一轉，又嚟放鬆一下啦~

一打開電梯門，真係嘩左一聲，咁有情調呀~

先嚟一杯士多啤梨味Cocktail，棉花糖包住個杯，真係夢幻感覺呀~

八爪魚沙律，八爪魚軟身不韌，一再配以黑醋拌勻沙律菜，好味又開胃呀~

炸蘑菇(其實個名我唔記得，請容許我幫佢改依個名啦)，口感都幾特別~

日式海鮮意大利飯，單睇個賣相都好吸引，原來攪攪下就會變晒色，味道都唔錯，如果可以乾身多少少就應該更加好味~

大蝦意粉，啲蝦肉都算幾彈牙，個醬汁配埋個意粉都幾入味~

黑醋低溫慢煮燒春雞，第一次食黑醋配雞嚟食，原來兩者又幾夾，再加上雞肉都好嫩身，真係幾好食。值得一提就係啲配菜，佢烤焗得都好入味呀~

最後當然唔少得甜品時間，又嚟我至愛Apple Crumble，焗得都好鬆化酥脆~

食飽飽之餘大家又有傾有講，相信全場最嘈都係我地依一張枱，不過......女仕們就係咁啦...哈哈哈，開開心心又過左一個晚上，充滿電又可以返去做返個好媽媽啦！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！